Helmohen nëntë punonjës të një fabrike përpunimi ulliri në Fier

Nëntë punonjës të një fabrike përpunimi ulliri janë paraqitur këtë të enjte me shenja intoksikimi në spitalin e Fierit.

Pacientët janë shoqëruar ne mjediset e urgjencës dhe po marrin ndihmën mjekësore.

Sipas mjekëve ata nuk paraqesin komplikacion dhe janë duke iu nënshtruar të gjitha ekzaminimeve mjekësore, raporton TCH.

Situata e pacientëve paraqitet e stabilizuar, duke qenë se kanë marrë në kohë edhe shërbimin mjekësor.

Është parë e nevojshme që katër pacientë të mbahen në observim spital, ndërsa të tjerët janë larguar për në shtëpi. Situata paraqitet normale edhe për katër pacientët që vijojnë të marrin terapi, e pas përfundimit të saj do të shoqërohen për në banesë.

Njoftimi i policisë:

Rreth orës 10:00, në Spitalin Rajonal Fier, kanë shkuar me shenja helmimi dhe ndodhen jashtë rrezikut për jetën, 9 shtetase, të cilat punojnë në një fabrikë përpunim ullinjsh, në aksin rrugor “Fier – Vlorë”.

Nga verifikimet paraprake, dyshohet se helmimi i tyre ka ardhur si pasojë e një reaksioni të shkaktuar nga produkti aromatizues (parfum) i përdorur nga njëra prej këtyre shtetasve.

Grupi hetimor po punon për zbardhjen e plotë të ngjarjes.