Leshnica e Poshtme u bë me objekt të ri shkollor, MASH-i investoi 4,5 milionë denarë

Nxënësit e Shkollës  Fillore rajonale “Luigj Gurakuqi” në f. Leshnicë e  Poshtme, Komuna e Zhelinës, nga sot mësimin do ta ndjekin në objektin e ri modern shkollor i cili ishte  pjesë e planit investues të Ministrisë së Arsimit dhe Shkencës, për të cilin janë ndarë rreth 4,5 milionë denarë.

Me këtë investim edhe një herë dëshmuam se Ministria e Arsimit dhe Shkencës kujdeset për të gjithë nxënësit në vend, pavarësisht nëse bëhet fjalë për mjedis urban apo rural. Të gjithë nxënësit dhe mësimdhënësit meritojnë  proces arsimor bashkëkohorë  dhe modern, i cili nënkupton jo vetëm përmirësimin e planeve dhe programeve mësimore  por edhe përmirësimin e kushteve në të cilat zhvillohet mësimi.

Sipas propozim-buxhetit për vitin 2023, është paraparë edhe  ndërtimi i objekteve të reja për Universitetin “Nënë Tereza”, SHMK “Sami Frashëri” në Kumanovë, si dhe përfundimi i objekteve tashmë të filluara të Fakultetit të Shkencave Informatike  dhe Inxhinierisë Kompjuterike dhe Fakultetit të Kulturës Fizike. Janë paraparë  mjete për rikonstruksionin dhe rinovimin e të gjitha konvikteve të studentëve në vend si dhe rehabilitimin e objekteve ekzistuese të 118 shkollave fillore dhe të mesme.