Procesi i dialogut Kosovë-Serbi, Ohri, vendi për takimin e rradhës Kurti-Vuçiq

Më 18 Mars, kryeministri i Kosovës, Albin Kurti dhe presidenti i Serbisë, Aleksandër Vuçiq, do të kenë takimin e radhës në Ohër në kuadër të Procesit të Dialogut. Pritet që diskutimi të bëhet rreth planit të zbatimit si pjesë përbërëse e Planit Franko Gjerman, i cili parashikon normalizimin e marrëdhënieve mes dy vendeve, për të cilin në Bruksel dy protagonistët arritën një dakordim fillestar. Analisti politik nga Kosova Blerim Burjani në një prononcim për TVM2 thotë se përzgjedhja e Ohrit si qytet ku do të mbahet takimi bëhet fillimisht për shkak të domethënies që ka ky qytet nga e kaluara, me shpresë se mund të shkruajë sërish një histori të re.

“Konsideroj se është përzgjedhur Ohri si vend neutral në Ballkan që është pikë lidhëse e Shqipërisë, Serbisë, e Kosovës dhe e Maqedonisë. Pra kur të flasim për Maqedoninë është një shtet multietnik, ndërsa Ohri është një vend ku është lidhur edhe marëveshja historike maqedono-shqiptare. Pse është zgjedhur Ohri? Mendoj se Ohri mund të jetë prapë pjesë e historisë së popujve ballkanik, pasiqë nëse lidhet, apo do të kemi një Marrëveshje për sa i përket Planit të Zbatimit, atëherë natyrisht se Ohri gjithashtu do të përmendet në situatën që u lidh një Marrëveshje historike mes Kosovës dhe Serbisë.”, tha Blerim Burjani, analist politik nga Kosova.

Sipas Burjanit mbetet për tu parë rrjedha e zhvillimeve si dhe epilogu sa I përket planit të zbatimit që sipas tij është enigmatik dhe me pak të dhëna sa i përket përmbajtjes.

“Palët do të jenë aty dhe natyrisht do të diskutojnë për planin e zbatimit i cili deri më tash është enigmatic dhe nuk ka transparencë, nuk kemi asgjë në mënyrë transparente se si do të duket ai plan, dhe nuk dimë se a do të jetë ky takim pune, apo do të jetë vetëm një dokument i cili është shkruar i gatshëm që quhet plan zbatues dhe palët vetëm do ta nënshkruajnë. Pra ne nuk e dimë më konkretishtë se a do të nënshkruhet një marrëveshje e tillë, përveq marrëveshjes Franko-Gjermane e cila nuk është nënshkruar por palët e konfirmuan vetëm gojarisht se do ta pranojnë planin.”, tha Burjani.

Burjani konsideron se arritja e një dakordimi mes palëve do të jetë një hap pozitiv që do të konfirmonte se dy vendet kanë ecur përpara drejt sigurimit të paqës, madje edhe heqjen e masave sanksionuese nga ana e BE-së, të cilat vlejnë për të dyja vendet.