Aksidenti i mbrëmshëm ka lënë pa autoambulancë Spitalin e Kumanovës

Spitali i Përgjithshëm i Kumanovës ka mbetur pa asnjë veturë të Ndihmës së Shpejtë, pasi një nga veturat është përmbysur mbrëmë në një aksident në Shkup, teksa transportonte një pacient nga Kumanova. Dy automjetet e tjera janë në servis, ndërsa për një tjetër pritet të përfundojë dhe prokurohet procedura e tenderit.

Për shkak të kësaj situate, menaxhmenti i spitalit do të duhet të huazojë autoambulancë nga Emergjenca e Shkupit apo nga ndonjë vend tjetër, sepse për momentin nuk ka të veten.

Aksidenti i rëndë ka ndodhur mbrëmë në orët e vona në Shkup. Auto-ambulanca e spitalit të Kumanovës është përplasur me një automjet tjetër në afërsi të kompleksit të klinikave “Nënë Tereza”.

Nga MPB priten detaje gjatë ditës së sotme.