Personat me pengesa në zhvillim kërkojnë të paktën tre deputetë në Kuvend

Nga 1,8 milionë votues, mbi 270 mijë janë votues me pengesa në zhvillim, por edhe pse kanë pasur të drejtën e votës, atyre u është mohuar e drejta që të jenë të zgjedhur, ankohen nga sektori joqeveritar. Në 30 vite parlamentarizëm në Kuvendin e Maqedonisë së Veriut nuk është zgjedhur asnjë deputet nga personat me pengesa në zhvillim. Shoqatat e personave me pengesa në zhvillim apelojnë te autoritetet e vendit, por edhe te shoqëria, që të ndryshohet vetëdija që edhe kjo kategori e qytetarëve të përfaqësohet në jetën politike. Ata mendojnë se në atë mënyrë më mirë do t’i realizonin të drejtat e tyre.

“Qëllimi i këtyre ndryshimeve të ligjit për partitë politike është që shteti ta plotësojë në një masë të caktuar obligimin pozitiv për sigurimin e kushteve për personat me pengesa në zhvillim, në mënyrë efektive dhe të plotë të marrin pjesë në jetën politike nëpërmjet përfshirjes së tyre në partitë politike, që rezulton me kandidimin e tyre nëpërmjet krijimit të obligimeve legjitime te partitë politike bazuar në financimin buxhetor. Vlerësojmë se kjo më së miri bëhet me stimulim pozitiv dhe negativ.”, – deklaroi Bllagica Dimitrovska nga Shoqata “Inkluziuva”.

Nga KShZ-ja thonë se marrin masa për personat me nevoja të veçanta në punën e këshillave zgjedhorë, ndërsa po bëhen përpjekje edhe deri te të gjitha institucionet që janë të lidhura me procesin zgjedhor.

“Prioritet i të dyja palëve ishte realizimi i qëllimeve nga memorandumi për bashkëpunim të kontribuojë për rritjen e përkrahjes së qytetarëve me pengesa, që në të gjitha segmentet dhe fazat e procesit zgjedhor, realizimin e të drejtës së votës, avancimin e punës së administratës zgjedhore me krijimin e kushteve për avancimin e përfshirjes së votuesve me pengesa dhe realizimin me sukses të zgjedhjeve inkluzive.”, – theksoi kryetari i KShZ-së, Aleksandar Dashtevski.

Njëherit është parashtruar nismë për ndryshime në Ligjin për Financimin e partive politike, me të cilat do të mundësohej që së paku tre deputetë të zgjidhen nga kategoria e personave me pengesa në zhvillim.