Shefi i OKB-së, liston ushtrinë izraelite si shkelëse e të drejtave të fëmijëve

Sekretari i Përgjithshëm i Kombeve të Bashkuara Antonio Guterres, e ka futur ushtrinë izraelite në një listë globale të atyre që kanë kryer shkelje ndaj fëmijëve.

Kështu tha i dërguari i Izraelit në OKB, Gilald Erdan, i cili vendimin e cilësoi si “të turpshëm”.

Ai tha se njoftimin zyrtar për vendimin e mori të premten, raporton Reuters, transmeton Klankosova.tv.

Lista globale është përfshirë në një raport mbi fëmijët dhe konfliktin e armatosur që do t’i dorëzohet Këshillit të Sigurimit të OKB-së më 14 qershor.

Ministri i Jashtëm i Izraelit, Israel Katz, tha se vendimi do të ndikojë në marrëdhëniet e vendit me Kombet e Bashkuara.

Erdan tha se ishte njoftuar nga shefi i shtabit të Guterres dhe postoi një video në mediat sociale ku ai i përgjigjej vendimit gjatë telefonatës së tyre.

“Jam krejtësisht i tronditur dhe i neveritur nga ky vendim i turpshëm i Sekretarit të Përgjithshëm. Ushtria e Izraelit është ushtria më morale në botë, kështu që ky vendim imoral vetëm do të ndihmojë terroristët dhe do të shpërblejë Hamasin”, tha ai.