Tentoi t’i korruptojë policët e trafikut me 20 euro, arrestohet një person në Gjakovë

Një person është arrestuar sot në Gjakovë, pasi i njëjti dyshohet se ka tentuar t’u japë ryshfet zyrtarëve policorë të Njësisë Rajonale të Komunikacionit Rrugor, raporton Gazeta Online Reporteri.net.

Sipas njoftimit të Policisë, gjatë  procesit të lëshimit të një gjobe për një kundërvajtje, i dyshuari në përpjekje të ndërhyjë në detyrat ligjore të zyrtarëve policorë, që të mos i shqiptonin gjobën, kishte hedhur një kartëmonedhë prej 20 eurosh në veturën e patrullës.

Shoferi i automjetit është shoqëruar në stacion policor dhe pas intervistimit me urdhër të prokurorit është dërguar në mbajtje si i dyshuar për veprën penale ‘Dhënia e ryshfetit’.

“Gjatë procesit të lëshimit të një gjobe për një kundërvajtje, i dyshuari A. G., (shoferi i automjetit) në përpjekje të ndërhyjë në detyrat ligjore të zyrtarëve policorë, që të mos i shqiptonin gjobën, kishte hedhur një kartëmonedhë prej 20 eurosh në makinën e patrullës. I dyshuari u shoqërua menjëherë në stacionin policor, si dhe kartëmonedha prej 20 eurosh është sekuestruar si provë. Në konsultim me prokurorin e shtetit, është iniciuar rast “dhënia e ryshfetit”, ndërsa i dyshuari është ndalur në mbajtje për 48 orë”, thuhet në njoftim.