43% e ujit të pijshëm shpërdorohet, më së shumti ujë shpenzon Tetova

Gjysma e 245 milionëve metër kub të ujit të prodhuar në vit shpërdorohet. Humbje më të mëdha deri në 43 për qind të ujit të pijshëm ka në Shkup, në Gostivar, Tetovë dhe Kërçovë. Më së shumti ujë harxhohet në Mavrovë dhe Tearcë, 70 metra kub në muaj dhe më pak në Staro Nagoriçane, 2.4 metra kub.

“Ekzistojnë dallime të mëdha edhe te konsumi mesatar i ujit te qytetet e mëdha. Mesatarja është rreth 10 metra kub në muaj, më së paku ujë harxhojnë banorët e Ohrit me 6 metra kub, ndërsa më së shumti tetovarët me 13 metra kub ujë. Shpenzimi mesatar i ujit të pijshëm në Shkup shënon 9 metra kub ujë në muaj.”, – deklaroi German Fillkov nga Qendra për Komunikime Qytetare.

Nga mbi 660 mijë amvisëri të regjistruara, 271 mijë janë në Shkup. Në Manastir, Kumanovë dhe Ohër ka mbi 30 mijë konsumatorë dhe më pak se 20 mijë në Tetovë, Gostivar, Strugë dhe Shtip. Por, 67 furnizuesit e ujit vendosin çmime të ndryshme për shërbimin e tyre. Çmimi më i ulët i ujit për amvisëri është në Bogovinë, Tearcë, Zhelinë, Vrapçisht dhe Rosoman, ndërsa ujin e pijshëm më shtrenjtë e paguajnë në Koçan, Dellçevë, Probishtip, Berovë dhe Sveti Nikollë. Kompanitë paguajnë më së liri për një metër kub ujë në Zhelinë, ndërsa më shtrenjtë është në Shkup.