OVL e UÇK-së në Ferizaj kërkon nga Maqedonia e Veriut lirimin e menjëhershëm të Blerim Ramadanit

Dega e OVL-UÇK në Ferizaj ka reaguar për arrestimin e ish-ushtarit të UÇK-së Blerim Ramadanit në Maqedoni të Veriut, duke u bazuar në fletarrest të lëshuar nga Serbia.

Kjo degë ka kërkuar lirimin e tij, po ashtu kanë kërkuar nga institucionet e Kosovës që të përdorin gjitha mjetet diplomatike e juridike për lirimin e Ramadanit.

Akuzat ndaj tij OVL-UÇK i cilëson si të fabirkuara nga Serbia, siç kanë vepruar edhe në të kaluarën.

“Ne veteranët e UÇK-së të Komunës së Ferizajt shprehim indinjatën e thellë për arrestimin e bashkëluftëtarit tonë Blerim Ramadani. Blerim Ramadani gjatë mesditës së sotme u arrestua nga organet policore të Republikës Veriore të Maqedonisë, për shkak të veprimtarisë së tij të ngjeshur në shërbim të luftës për çlirim, akuza të fabrikuara këto nga shteti i Serbisë”.

“Aktakuzat e fabrikuara dhe arrestimet e bashkëluftëtarëve ende sot pas 25 viteve janë të padrejta dhe shqetësuese për të gjithë ne veteranët. OVL UÇK dega në Ferizaj bën apel tek shteti Maqedon që menjëherë të lirojë Blerim Ramadanin, kërkojmë nga Qeveria e Republikës së Kosovës, Ministria e Punëve të Jashtme dhe ajo e Drejtësisë që të përdorë të gjitha mjetet diplomatike e juridike për lirimin sa më të shpejtë të bashkluftëtarit të lirisë, veteranin e ditëve të para. Lufta e UÇK-së ishte e pastër me angazhimin e shumë djemve e vajzave të Kosovës të rreshtuar në radhët e UÇK-së, ishte dhe do të mbetet e pacenueshme dhe nuk do të njolloset asnjëherë”, thuhet në njoftimin e OVL-UÇK.