Pjetër Shala shpallet fajtor për krime lufte nga Gjykata Speciale, dënohet me 18 vjet burgim

Trupi gjykues i Gjykatës Speciale ka shpallur aktgjykimin ndaj Pjetër Shalës, ish-pjesëtarit të Ushtrisë Çlirimtare të Kosovës (UÇK), i cili akuzohej për krime lufte. Ai është dënuar me 18 vjet burgim.

Shala është shpallur fajtor për veprën penale të ndalimit arbitar, torturës dhe vrasjes së paligjshme, si krim lufte, shkruan gazeta online Reporteri.net.

Për veprën penale ndalim arbitar, Shala është dënuar me 6 vjet burgim, për torturë 16 vjet burgim dhe 18 vjet burgim për vrasje të paligjshme.  Atij i është shqiptuar dënim i njësuar me 18 vjet burgim.

Shala është liruar nga akuza për veprën penale të trajtimit mizor.

Kryetarja e Trupit Gjykues tha se ky organ në bazë të provave të paraqitura  ka konstatuar se ish-pjesëtari i Ushtrisë Çlirimtare të Kosovës, Pjetër Shala, ka marrë pjesë në ndalimin arbitrar, trajtim mizor, torturë të 18 personave në periudhën mes 17 majit 1999 deri më 5 qershor të atij viti.

Trupi gjykues ka konstatuar po ashtu edhe përfshirjen e Shalës në një rast në vrasjen e paligjshme të një të ndaluari në fabrikën e metalit në Kukës.

“Trupi gjykues konstaton se Shala është fajtor për veprën penale të ndalimit arbitrar, torturës dhe vrasjes së paligjshme si pjesë e një ndërmarrje të përbashkët kriminale. Rrjedhimisht bazuar në tërësinë e provave Trupi Gjykues konstaton se Shala është fajtor për kryerjen e veprave penale: ndalim arbitrar kundër së paku 18 personave, torturë kundër së paku 18 personave dhe vrasjes si krim lufte kundër një personi”, u tha gjatë shpalljes së aktgjykimit.

Shala ishte arrestuar më 16 mars 2021 në Belgjikë dhe është transferuar në objektin e Gjykatës Speciale, në Hagë të Holandës, më 15 prill 2021.

Në aktakuzën e konfirmuar, Shala ngarkohej me përgjegjësi penale individuale në forma të ndryshme për krime lufte si ndalim arbitrar, trajtim mizor, torturë dhe vrasje të paligjshme, të kryera në kontekstin e konfliktit të armatosur në Kosovë dhe në lidhje me këtë konflikt.

“Krimet për të cilat akuzohet z. Shala u kryen përafërsisht midis 17 majit 1999 dhe 5 qershorit 1999, kundër personave që u mbajtën të ndaluar në fabrikën e metalit në Kukës (Shqipëri), që pretendohet se përdorej prej Ushtrisë Çlirimtare të Kosovës”, ishte thënë në aktakuzë.

Ai është deklaruar i pafajshëm për akuzat që rëndojnë mbi të.

Ky është aktgjykimi i dytë për krime lufte,  i shpallur nga Gjykata Speciale.