Vazhdon intervistimi i Ministres Haxhiu nga Prokuroria Speciale për deklaratat rreth Faton Hajrizit dhe të burgosurve tjerë

Ashtu siç dhe u konfirmua dje, Ministrja e Drejtësisë, Albulena Haxhiu ka vazhduar intervistimin edhe ditën e sotme në Prokurorinë Speciale rreth deklaratave të saj të fundit për Faton Hajrizin si dhe të burgosurit e tjerë të arratisur, shkruan Gazeta Online Reporteri.net.

Intervistimi i saj dje u konfirmuar nga Prokuria Speciale në një përgjigje dhënë për Gazetën Online Reporteri.net.

“Prokuroria Speciale e Republikës së Kosovës, njofton opinionin publik se me autorizim të Prokurorisë Speciale, sot është intervistuar Ministrja e Drejtësisë Albulena Haxhiu, me qëllim të sqarimit të deklaratës së saj të dhënë në mediumin TV Dukagjini, në emisionin “Debat Plus’’ më datë 02 Korrik 2024, lidhur me takimet dhe diskutimet e mundshme me prokurorë dhe gjyqtarë për raste të caktuara, si dhe postimin e saj në rrjetin social Facebook të datës 20 Korrik 2024, lidhur arratisjet që kanë ndodhë nga burgjet e Kosovës. Intervistimi i të njëjtës për sqarim të këtyre çështjeve do të vazhdoj edhe nesër”, u tha në përgjigjen e Prokurorisë Speciale për Reporteri.net.

Në ditën kur u raportua për vrasjen e Faton Hajrizit, Ministrja Haxhiu kishte ngritur dyshime për vrasjen.

Madje ajo kishte thënë se Serbia po organizon arratisjen e të burgosurve nga Kosova.

“E rëndësishme të potencohet fakti që arratisja e disa personave që po kërkohen nga institucionet përgjegjëse në Republikën e Kosovës po bëhet vetëm në një drejtim: atë të territorit të Serbisë. Informacionet e organeve tona sugjerojnë që së paku në disa raste, këto arratisje janë cytur, organizuar, bashkëorganizuar e lehtësuar nga grupe kriminale të lidhura me struktura të pushtetit në territorin e Serbisë. Ky organizim konsiston në dhënien e garancisë që për personat e tillë territori i Serbisë, grupet kriminale atje, e nivele të caktuara të pushtetit, u ofrojnë mburojë nga ndjekja penale e Republikës se Kosovës”, kishte thënë Haxhiu.