FSHF-ja ia beson RTSH-së të drejtat televizive për kampionatin shqiptar

Federata Shqiptare e Futbollit ka bërë me dije se ka firmosur marrëveshje me Radio Televizionin Shqiptar për të drejtat televizive të futbollit shqiptar.

RTSH-ja do të transmetojë për tre sezonet e ardhshme kampionatin Kategoria Superiore, duke përfshirë edhe Final 4, Kategorinë e Parë, Kupën e Shqipërisë dhe Superkupën e Shqipërisë.

Sipas marrëveshjes, RTSH merr të drejtën televizive për sezonet 2024/25; 2025/26; 2026/27 të kompeticioneve kombëtare për territorin e Shqipërisë dhe Kosovës.

Kampionati i Kategorisë Superiore do të nisë edicionin e 86-të më 18 gusht, ndërsa Kategoria e Parë do të nisë më 24 gusht.