Ja ku po planifikohet për t’u ndërtuar kjo super autostradë, 93 km me ajër të kondicionuar

Dubai po planifikon ndërtimin e një autostrade të jashtëzakonshme prej 93 kilometrash që do të ofrojë një ambient të klimës së kontrolluar për çiklistët dhe vrapuesit, me qëllim transformimin e qytetit në një qendër të qëndrueshmërisë dhe aktivitetit fizik. Nëse plani i zhvilluesit URB miratohet, kjo strukturë do të quhet “The Loop” dhe do të krijojë një korridor të gjelbër pa makina, të mbushur me pemë dhe bimë për të lehtësuar aktivitetet në këmbë ose biçikletë në qytet.

Pjesë e këtij plani është edhe “Agri Hub”, një projekt ambicioz agroturizmi që do të shtrihet mbi 40 hektarë dhe do të përfshijë hapësira për arsim dhe kërkime, eko-lozha, dyqane fermash, restorante dhe kafene nga ferma në tryezë.

Ky projekt do të përdorë teknologji të avancuar për të mbajtur një bilanc të qëndrueshëm, duke përfshirë bujqësi bio-kripur dhe riciklimin e ujit për ujitjen e zonave publike. I gjithë zhvillimi do të mbështetet nga energjia kinetike dhe do të përdorë vetëm ujë të ricikluar. Nëse realizohet, “The Loop” mund të jetë gati për përdorim deri në vitin 2040.