Gashi – Bron Pive: E keni mbështetjen franceze për anëtarësim në BE
Kryetari i Kuvendit, Afrim Gashi, së bashku me deputetët Beti Stamenkoska-Trajkoska, Borçe Cvetkov dhe Saranda Imeri Stafai, sot realizuan takim me kryetaren e Kuvendit Kombëtar të Republikës së Francës, Jael Bron Pive, informojnë nga shërbimi për informim i Kuvendit.
Gashi shprehu kënaqësinë e veçantë për mbajtjen e takimit, duke pasur parasysh faktin se për shumë vite nuk ka pasur takim në këtë format në Paris dhe shpreson se ai do të përvijojë trajektoren e takimeve të ardhshme dhe do të sjellë impuls të fortë të bashkëpunimit të frytshëm ndërmjet parlamenteve tona në të gjitha nivelet.
“U theksua se Kuvendi e vlerëson jashtëzakonisht përkushtimin dhe mbështetjen aktive parlamentare franceze për integrimin tonë evropian. Në këtë kuadër, u theksua se për miratimin e ndryshimeve kushtetuese nevojiten garanci të ardhshme për zbatimin e procesit të anëtarësimit në BE dhe vlerësimin e vendit ekskluzivisht sipas Kritereve të Kopenhagës dhe metodologjisë së re të negociatave”, thonë nga Kuvendi i Maqedonisë.
Kryetarja Bron Pive theksoi rëndësinë e diplomacisë parlamentare si segment i rëndësishëm në politikën e jashtme, përfshirë në kontekstin e BE-së dhe nderin e pritjes së delegacionit nga Kuvendi i Republikës së Maqedonisë së Veriut.
Interesimi u shpreh për statusin aktual të agjendës së brendshme evropiane, procedurën për hapjen e klasterëve të negociatave dhe çështjeve të hapura në rrugën drejt BE-së.
“Të jeni të sigurt se keni mbështetjen e Francës, e cila ndan ambicien tuaj për të zbatuar reformat e anëtarësimit në BE dhe ndërgjegjësimin tonë se kjo garë nuk mund të jetë e pafund, sepse ju presim sa më shpejt në familjen evropiane”, përfundoi Bron Pive.
Të dy bashkëbiseduesit konfirmuan interesin e ndërsjellë për formimin e vazhdueshëm të grupeve të miqësisë midis dy parlamenteve, si dhe gatishmërinë për bashkëpunim më të ngushtë në të gjitha nivelet parlamentare në fushën e çështjeve evropiane.
Në takim morën pjesë edhe Eleonor Karua, nënkryetare e Komisionit për Politikë të Jashtme, Loran Mazori, nënkryetar i Komisionit për Çështje Evropiane dhe Damien Shamisi, sekretar i përgjithshëm i Kuvendit Kombëtar dhe Kryesisë.
