“K’cimi i Tropojës” në UNESCO/ Rama: Trashëgimi që ishte braktisur nën pluhurin e harresës

“K’cimi i Tropojës” është shpallur zyrtarisht pjesë e Listës Përfaqësuese të Trashëgimisë Kulturore Jomateriale të Njerëzimit në UNESCO. Në një postim në Facebook, kryeministri Edi Rama shprehet se gjatë kësaj dekade është bërë shumë për këtë trashëgimi që ishte braktisur nën pluhurin e harresës.

“Mirëmëngjes dhe me lajmin e bukur se “K’cimi i Tropojës” shpallet zyrtarisht pjesë e Listës Përfaqësuese të Trashëgimisë Kulturore Jomateriale të Njerëzimit në UNESCO, si edhe me kënaqësinë e progresit të kësaj dekade për shpëtimin, rilindjen e promovimin e vlerave të kësaj trashëgimie deri dje të braktisur nën pluhurin e harresës, ju uroj një ditë të mbarë“, shkruan kryeministri Rama.

Vendimi për t’u bërë pjesë e Listës Përfaqësuese të Trashëgimisë Kulturore Jomateriale të Njerëzimit erdhi pas vlerësimit pozitiv nga Organizmi i Vlerësimit të UNESCO-s, gjatë sesionit të 19-të të Komitetit Ndërqeveritar për Ruajtjen e Trashëgimisë Kulturore Jomateriale, në Asuncion, Paraguaj.

“K’cimi i Tropojës”, i njohur edhe si “K’cim Veni”, ka ruajtur vitalitetin e tij ndër shekuj. Ai përfshin elementë të artit performues, traditave, ritualeve dhe ngjarjeve festive. Përgjatë viteve, kjo traditë ka mbetur një simbol i identitetit dhe bashkimit për banorët e Tropojës dhe Malësisë së Gjakovës.