Mund të kalojnë katër vjet deri në mbajtjen e zgjedhjeve, thotë lideri i Sirisë

Udhëheqësi de fakto i Sirisë, Ahmad dal-Sharaa, ka thënë të dielën se mund të duhen deri në katër vjet për të mbajtur zgjedhjet në Siri, dhe se ai ka në plan të shpërbëjë grupin e tij islamik që udhëhoqi kryengritjen e vendit, në një samit të dialogut kombëtar për vendin.

Al-Sharaa, lider i Hayat Tahrir al-Sham (HTS), grupi që udhëheq autoritetin e ri në Siri, i bëri komentet në një intervistë me rrjetin televiziv saudit Al-Arabiyya, raporton AP.

Deklarata e tij vjen pothuajse një muaj pasi një kryengritje rrufe e udhëhequr nga HTS-ja përmbysi sundimin prej dekadash të presidentit Bashar al-Assad, duke i dhënë fund luftës civile të shndërruar në kryengritje të vendit që filloi në vitin 2011.

Al-Sharaa ka thënë se do të duhet kohë për të mbajtur zgjedhjet për shkak të nevojës që forcat e ndryshme të Sirisë të zhvillojnë dialog politik dhe të rishkruajnë kushtetutën e vendit pas pesë dekadave të sundimit diktatorial të dinastisë Assad.

“Sot ne po rithemelojmë shtetin dhe nuk po i ridrejtojmë punët e shtetit siç ishin në të kaluarën”, ka thënë al-Sharaa, i njohur më parë si Abu Mohammed al-Golani.

Al-Sharaa është udhëheqësi de fakto i Sirisë deri më 1 mars, kur fraksionet e ndryshme të Sirisë do të zhvillojnë një dialog politik për të përcaktuar të ardhmen politike të vendit dhe për të krijuar një qeveri kalimtare që bashkon vendin e ndarë.

Ai ka thënë se HTS-ja do të shpërbëhet pas vitesh të të qenit grupi rebel më dominues i vendit që mbante një enklavë strategjike në veriperëndim të vendit.

Ndryshe nga kritikat e tij ndaj Iranit, aleatit kryesor të Assadit, al-Sharaa shpreson të ruajë “marrëdhënie strategjike” me Rusinë, forcat ajrore të së cilës luajtën një rol kritik në mbajtjen e Assadit në pushtet për më shumë se një dekadë gjatë konfliktit.

Moska ka një bazë ajrore strategjike në Siri.

Udhëheqësi i HTS-së ka thënë gjithashtu se negociatat janë duke vazhduar me Forcat Demokratike Siriane të udhëhequra nga kurdët në Sirinë verilindore dhe shpreson që forcat e tyre të armatosura të integrohen me agjencitë siriane të sigurisë.