Parashikimi i motit

Moti sot do të jetë i ndryshueshëm me vranësira dhe i ftohtë me reshje të kohëpaskohshme lokale të borës në pjesët veriore të vendit, ndërsa në pjesët juglindore me shi të kohëpaskohshëm. Do të fryjë erë mesatare deri e përforcuar nga drejtimi verior, në disa vende me shpejtësi mbi 60 kilometra në orë.
Temperatura minimale do të jetë në interval prej -2 deri 4, ndërsa ajo maksimale do të lëvizë prej 2 deri 7 gradë.

Në Shkup mot i vranët dhe i ftohtë me reshje të kohëpaskohshme të shiut dhe borës, ndërsa në pjesët më të larta të luginave me borë të kohëpaskohshme. Pasdite reshjet do të ndalen. Do të fryjë erë mesatare nga drejtimi verior. Temperatura minimale do të bie deri në 1, ndërsa ajo maksimale do të arrijë deri 6 gradë.

Sipas parashikimit të DPHM-së, deri të premten do të mbizotërojë mot i ndryshueshëm me vranësira, me erë dhe i ftohtë me reshje të kohëpaskohshme lokale kryesisht të borës. Do të fryjë erë mesatare, ndërsa përgjatë Vardarit erë e fuqishme veriore mbi 60 kilometra në orë.

Nga e shtuna vijon periudhë e motit të qëndrueshëm me temperatura të ulëta të mëngjesit. Nëpër disa lugina do të ketë paraqitje të mjegullës dhe temperaturave më të ulëta të ditës.