Ancelotti: Jam i habitur me kritikat. Thonë se luajmë keq, por jemi kryesues…

Carlo Ancelotti doli në konferencën për shtyp në “Bernabéu” pas fitores mbresëlënëse të Real Madridit kundër UD Las Palmas.

Reagimi pas finales së Superkupës: “Futbolli është i tillë, por ende jam pak i hutuar, sepse kam dëgjuar që luajmë shumë keq, por jemi kryesues. Ishte një ndeshje e rrumbullakosur, e plotë, me cilësi dhe qëndrim të mirë. Filloi keq, por kjo nuk e ndryshoi dinamikën. Mbappé na ndihmoi, sepse është në një formë të shkëlqyer”.

Puna mendore: “Ne jemi të aftë ta ruajmë ekuilibrin, t’i menaxhojmë si momentet e mira, ashtu edhe ato të vështira”.

Ashpërsia e kritikave: “Mendoj se po, kritikat janë më të ashpra ndaj nesh”.

Mbappé: “Është sulmuesi më i mirë në botë në qendër. Disa dyshonin nëse mund të luante në atë pozicion. Ai është një sulmues i madh, që ndjehet më mirë në qendër sesa në krah, sepse kështu shfrytëzon më mirë lëvizjet e tij unike”.

Loja e Real Madridit: “Ndonjëherë luajmë mirë, ndonjëherë më pak mirë, por të thuash që luajmë keq…!!! Ekipi është i kushtëzuar nga mungesat e rëndësishme. Ndonjëherë nuk ka ekuilibër të mirë ose përkushtim, askush nuk është perfekt. Nuk shoh superekipe. Ne përpiqemi të luajmë sipas karakteristikave të lojtarëve tanë”.

Penalltia e Mbappé: “Renditja është: Vini, Mbappé, Bellingham në goditjet e 11-metërshave”.

Jeta e Ancelottit: “Kam një jetë dhe po e shijoj, përpiqem. E vërteta është që Real Madridi më ndihmon shumë ta shijoj”.

A e ndihmojnë kritikat: “Ka kritika dhe kritika. Fishkëllimat në ‘Bernabéu’ më lëndojnë, sepse tifozeria nuk është e kënaqur, por edhe motivojnë. Këshilla që morëm në ndeshjen e kupës ishte e dobishme për ekipin, i cili tregoi një version më të mirë”.

Një javë shumë e vështirë: “Jo më e vështira, por ishte një javë e ndërlikuar, sepse kur merr një goditje duhet të jesh pranë ekipit, ta inkurajosh atë. Nuk ishte më e vështira, megjithëse kur humbet një klasike është më e komplikuar. Në vështirësi duhet të jesh autokritik dhe pozitiv për të ecur përpara”.

Shënim: Disa imazhe gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.