Gripi sezonal po merr hov, Rexhepi: Trajtimi në kohë, i rëndësishëm

Sipas të dhënave të IShP-së për një javë janë regjistruar mbi 330 pacientë me simptome të gripit. Mjekët thonë që çdo ditë po rritet numri i pacientëve me grip dhe nëse nuk trajtohen në kohë mund të shkaktohen komplikime në shëndet. Apelojnë për kujdes të shtuar, marrjen e sa më shumë vitaminave dhe mineraleve në këtë periudhë të dimrit, si dhe shmangien e ambienteve jashtë pa nevojë.

“Kemi rritje shumë të madhe si në ambulancën tonë, por edhe në ambulancat tjera. Mbi 50 pacientë në ditë ndodh që të kemi për kontrolle me simptome të gripit sezonal. Zakonisht pacientët vijnë me ethe, me temperaturë të lartë, me dhimbje të trupit, me kollitje të thatë, varësisht se sa janë vonuar deri në paraqitjen e tyre deri tek mjeku amë për kontroll, kemi lotim të syve, bllokim të hundëve, teshtitje, dhimbje të nyjave. Ne fillojmë gjithnjë me terapi simptomatike, sepse gripi sezonal shkaktohet nga virusi dhe nuk trajtohet me antibiotikë, varësisht a ka temperaturë, kollitje, frymëmarrje të rënduar, fillojmë me dhënien e vitaminave, sidomos tek pacientët që janë me komorbiditete dhe imunitet të dobët.”, – deklaroi mjeku, Shpejtim Rexhepi.

Sa i përket virusit metapneumo, mjeku Shpejtim Rexhepi thotë që ky virus është i ngjashëm me gripin dhe nuk ka nevojë për shqetësim të popullatës, pasi që është i menaxhueshëm.

“Metapneumo virusi ka qenë edhe para disa viteve prezent në shtetin tonë, nuk është ndonjë virus i ri për anembanë shtetet, tash e kemi riparaqitjen e tij në Greqi dhe në vendin tonë deri më tani nuk ka ndonjë statistikë që e kemi prezent, mirëpo nuk ka nevojë për panik të jashtëzakonshme, sepse metapneumo virusi është i ngjashëm me simptome të gripit apo të kovid 19 dhe për momentin është i menaxhueshëm.”, – theksoi mjeku, Shpejtim Rexhepi.

Qytetarët mendojnë se ajri i ndotur më shumë i dëmton në shëndet sesa simptomat e gripit sezonal, apelojnë autoritetet të marrin masa urgjente.

“Po, më shumë e kemi prej ajrit të ndotur sesa prej gjërave tjera. Qeveria duhet të marrë masa.”, – tha një qytetar.

“Më pengon shumë ajri i ndotur. Kam kollitje në mbrëmje.”, – tha një qytetar tjetër.

“Ajri i ndotur më pengon shumë, sepse kam bronkit, ndërsa për grip kam marrë vaksinë.”, – u shpreh një qytetar.

Mjeku Rexhepi këshillon pacientët që kanë simptome të gripit të paraqiten për kontroll tek mjeku amë, që pastaj t’i trajtojnë në mënyrë simptomatike.