Një valë e ftohtë pritet ta kaplojë Maqedoninë, priten reshje shiu dhe bore

Një valë e ftohtë me shi dhe borë, paralajmëron DPHM për ditët në vijim. Nesër, nga fundi i ditës, në pjesët perëndimore dhe veriore do të ketë reshje të herëpashershme lokale shiu.

Të shtunën do të mbizotërojë mot pjesërisht i vranët me reshje të herëpashershme shiu, ndërsa në male dhe disa vende më të larta do të ketë borë.

Të dielën, moti do të jetë i vranët dhe i ftohtë me reshje, të cilat për shkak të një mase ajri më të ftohtë dhe erës së fortë veriore, në pjesën më të madhe të vendit do të jenë me borë dhe në disa vende do të jenë më të dendur

Në shumë vende pritet të formohet një shtresë dëbore, ndërsa në male pritet një shtim më i theksuar i saj. Për shkak të temperaturave të ulëta, do të ketë shfaqje të ngricave.

Bora e herëpashershme do të vazhdojë edhe të hënën, pas së cilës do të mbizotërojë mot i qëndrueshëm dhe i ftohtë. Temperaturat e mëngjesit do të jenë negative në të gjithë vendin, ndërsa në disa vende edhe temperaturat ditore do të mbeten nën zero.

Në Shkup, të shtunën do të ketë reshje të herëpashershme shiu, ndërsa në malet përreth do të ketë borë. Të dielën, moti do të jetë i vranët dhe i ftohtë, me erë të moderuar deri të fortë nga veriu dhe me reshje të herëpashershme bore. Pritet të formohet një shtresë e vogël dëbore.