Padi penale ndaj një mjeku dhe pesë personave tjerë, me dokumente të rreme kinse kishin pësuar lëndime nga aksidentet kanë përfituar para

SPB Tetovë ka dorëzuar kallëzim penal kundër I.B. (52) nga Tetova, A.P. (39) nga Shkupi, A.L. (30), S.A. (48) nga Gostivari, me vendbanim në Tetovë, D.A. (25) nga Tetova dhe E.J. (34) nga Tetova, për dyshime të bazuara për veprën penale “ndihmë” në lidhje me “mashtrim”. Ndaj I.B. është dorëzuar gjithashtu një kallëzim penal për “keqpërdorim të pozitës dhe autorizimit zyrtar” dhe “falsifikim të dokumenteve zyrtare”, ndërsa ndaj A.P. për “keqpërdorim të pozitës dhe autorizimit zyrtar”, “raste të veçanta të falsifikimit të dokumenteve” dhe “përdorim të dokumentit me përmbajtje të rreme”.

I dyshuari i parë, I.B., në cilësinë e mjekut në Qendrën Klinike Tetovë, në vitin 2021, ka krijuar një raport mjekësor me përmbajtje të rreme për gjoja lëndime trupore të shkaktuara nga aksidente trafiku në emër të të dyshuarve të pestë, D.A., dhe të gjashtë, E.J., me qëllim kompensimin për dëme jomateriale nga kompanitë e sigurimeve.

I dyshuari i dytë, A.P., në cilësinë e avokatit, ka përgatitur një prokurë pa datë dhe nënshkrim nga të dyshuarit A. dhe J., dhe pa praninë apo pëlqimin e tyre, e ka dorëzuar në një kompani sigurimesh në Shkup për kompensim për dëme jomateriale në vlerë prej 680.000 denarësh.

I dyshuari i tretë ka ndërmjetësuar në dorëzimin e dokumentacionit të falsifikuar në zyrën e avokatit të të dyshuarit të dytë dhe ka tërhequr shumën prej 399.350 denarësh nga një filial banke në Tetovë, e cila ishte transferuar në llogarinë e të dyshuarit të pestë.

I dyshuari i katërt, megjithëse e dinte se dokumentacioni ishte fiktiv, ka ndihmuar të dyshuarin e gjashtë për të siguruar të gjithë dokumentacionin e falsifikuar dhe ka tërhequr një shumë prej 280.000 denarësh, e transferuar në llogarinë e të dyshuarit të gjashtë.

Të dyshuarit i pestë dhe i gjashtë, megjithëse e dinin se nuk u takonte kompensim jomaterial në lidhje me aksidentet trafiku, kanë dhënë të dhënat e tyre personale për të realizuar veprimet e përmendura kriminale, duke i shkaktuar një dëm kompanisë së sigurimeve në vlerë prej 680.000 denarësh.