Planet e Trump për të deportuar emigrantët ilegalë, Papa Françesku: Turp nëse realizohen!
Papa Françesku ka thënë se planet e Donald Trump për të deportuar emigrantët ilegalë nga SHBA do të ishin një “turp” nëse do të realizoheshin.
Duke folur për një program televiziv italian nga rezidenca e tij në Vatikan, Papa tha se nëse këto plane do të realizoheshin, Trump do të bënte që “të mjerët që nuk kanë asgjë të paguajnë faturën.”
“Kjo nuk është e drejtë. Kjo nuk është mënyra për të zgjidhur problemet,” tha ai.
Trump ka premtuar të nisë dëbimin më të madh të emigrantëve të paautorizuar në historinë e SHBA-së menjëherë pas marrjes së detyrës.
Në një mesazh për Trump të publikuar të hënën, Papa Françesku i ofroi “përshëndetje të përzemërta” dhe e nxiti atë të udhëheqë një shoqëri ku “nuk ka vend për urrejtje, diskriminim apo përjashtim” dhe të promovojë “paqen dhe pajtimin midis popujve.”
Papa njihet për kujdesin e tij të veçantë ndaj çështjes së emigrantëve. Gjatë një audience publike në gushtin e kaluar, ai tha se “puna sistematike për të larguar emigrantët me çdo mjet” ishte “një mëkat i rëndë.”
Në vitin 2016, përpara zgjedhjeve të para presidenciale të fituara nga Trump, Papa Françesku tha se “një person që mendon vetëm për të ndërtuar mure… dhe jo për të ndërtuar ura, nuk është i krishterë.”
Duke iu referuar premtimit të Trump për të ndërtuar një mur në kufirin meksikan për të ndaluar emigrantët të hyjnë në SHBA, Françesku tha: “Unë them vetëm se ky njeri nuk është i krishterë nëse ka thënë gjëra të tilla. Duhet parë nëse i ka thënë në këtë mënyrë.”
Françesku dhe Trump më vonë u takuan kur Trump dhe familja e tij vizituan Romën në vitin 2017.
Para zgjedhjeve presidenciale të SHBA-së në 2024, Papa nuk pranoi të thoshte nëse njerëzit duhet të votojnë për Trump apo për kundërshtaren e tij demokrate Kamala Harris, duke nxitur njerëzit të zgjedhin “të keqen më të vogël” sipas ndërgjegjes së tyre.
Gjatë intervistës të dielën në mbrëmje, Françesku gjithashtu u ndal te çështja e emigracionit në Evropë, duke thënë se kishte “shumë mizori” dhe se të gjithë kishin “të drejtën për të qëndruar në shtëpi dhe të drejtën për të emigruar.”
Françesku, 88 vjeç, është në këtë post që nga viti 2013, kur u zgjodh për të pasuar Papa Benediktin XVI.
