Prokuroria Publike nuk do të kërkojë përshkallëzimin e masave të kujdesit kundër Merkos

Prokuroria Publike për momentin nuk do të kërkojë përshkallëzimin e masave të kujdesit kundër kreut të Strugës, Ramiz Merko ndaj të cilit aktualisht në gjyq udhëhiqen disa akuza, shumica prej tyre për shpërdorim me detyrën zyrtare, shkruan Alsat.

Në një qëndrim të prokurorisë thuhet se kërkesa për masa kujdesi bazohet në plotësimin e kushteve dhe për momentin nuk ka vlerësim që mund t’i çon prokurorët përkatës të kërkojnë ndryshimin e masave të kujdesit.

Me aktakuzën e fundit të ngritur më 27 dhjetor kundër Merkos zhvillohen gjithsej nëntë procedura aktive gjyqësore dhe në secilën prej tyre ai rrezikon dënimin me burg.

Akuzat kanë të bëjnë me emërimet jo ligjore të drejtorëve nëpër shkollat fillore, blerjen e veturës luksoze të tipit Audi, dhënien e lejes për ndërtime në kundërshtim me ligjin dhe vendosjen e pllakës përkujtimore në hyrje të objektit të komunës. / Alsat.mk