Sot bojkotohen marketet në Maqedoni të Veriut dhe në rajon

Sot pritet që qytetarët të mos bëjnë blerje në markete për shkak të çmimeve të larta të produkteve ushqimore.
Kjo vjen pas iniciativës që fillimisht ndodhi në Kroaci, e cila u ndoq edhe në Serbi, Bosnje dhe Hercegovinë, Mal të Zi dhe Slloveni.

Populli reagoi pasi asnjë masë e Qeverisë nuk arriti të përballojë shpejtësinë e rritjes së çmimeve të ushqimeve.

Një pjesë e tregtarëve vendosën sot të bëjnë inventar në dyqanet e tyre, disa t’i mbyllin marketet, ndërsa të tjerë do të punojnë dhe i ftojnë qytetarët për të bërë pazar me zbritje ekstra.

Aksioni mori mbështetje nga opinioni i gjerë publik, si dhe nga partitë e pushtetit dhe opozita, ndërkohë që institucionet përgjegjëse paralajmëruan kontrolle rigoroze në markete dhe objekte tregtare, si dhe reagim të menjëhershëm në terren.

Kryeministri Hristijan Mickoski ditët e fundit disa herë shprehu mirëkuptim për bojkotin dhe paralajmëroi kontrolle të shtuara dhe gjoba për tregtarët që shkelin ligjin, si dhe masa për mbrojtjen e standardit jetësor.

Ai edhe dje nga foltorja e Kuvendit, gjatë seancës për pyetjet parlamentare, theksoi se nuk do të lejohet që individë të keqpërdorin pozitat e tyre dhe të pasurohen në kurriz të qytetarëve.