Barazim në Romë mes Lazios e Napolit

Napoli është ndalur sërish në barazim në Serie A.

Skuadra e drejtuar nga trajneri Antonio Conte, Napoli, është ndalur në barazim 2:2 nga Lazio në udhëtim.

Kjo ndeshje u zhvillua të shtunën dhe i takoi javës së 25-të të Serie A.

Për Napolin ky ishte barazimi i tretë rresht në ligë.

Vendësit kaluan të parët në epërsi në minutën e gjashtë me golin e shënuar nga Gustav Isaksen.

Shtatë minuta më pas, Giacomo Raspadori i barazoi shifrat.

Adam Marushiq realizoi autogol në minutën e 64-t për epërsinë 2:1 të Napolit.

Boulaye Dia në minutën e 87-të realizoi për 2:2 dhe ia siguroi një pikë shumë të vlefshme Lazios.

Te vendësit në bankën rezervë ishte Arijon Ibrahimoviqi kurse për shkak të lëndimit mungoi Elseid Hysaj.

Te Napoli ndeshjen e kompletoi Amir Rrahmani.

Napoli ka 56 pikë kurse Lazio ka dhjetë pikë më pak.

Të dyja skuadrat renditen në pjesën e epërme të tabelës.