Britania kundër idesë së Trumpit: Nuk do të lejojmë zhvendosjen e palestinezëve nga Gaza

Britania e Madhe do të kundërshtojë çdo përpjekje për të zhvendosur palestinezët në Gaza drejt shteteve arabe fqinje kundër vullnetit të tyre, ka deklaruar ministrja e Zyrës së Jashtme, Anneliese Dodds

Ajo theksoi se çdo zhvendosje e detyruar do të ishte e papranueshme dhe në kundërshtim me të drejtat themelore të popullit palestinez dhe ligjin ndërkombëtar.

Duke iu përgjigjur një pyetjeje urgjente në Dhomën e Komunave, Dodds nënvizoi rëndësinë e një zgjidhjeje të drejtë dhe të qëndrueshme për popullin palestinez, duke theksuar se “palestinezët duhet të përcaktojnë të ardhmen e Gazës me mbështetjen e shteteve rajonale dhe komunitetit ndërkombëtar më gjerë. Ne do të kundërshtojmë çdo përpjekje për të zhvendosur palestinezët në Gaza drejt shteteve arabe fqinje kundër vullnetit të tyre. Nuk duhet të ketë zhvendosje të detyruar të palestinezëve dhe as reduktim të territorit të Rripit të Gazës.”

Ajo gjithashtu nënvizoi rëndësinë e garantimit të të drejtave të civilëve palestinezë për t’u kthyer dhe për të rindërtuar jetën e tyre pas konflikteve shkatërruese, shkruan timesofisrael.

“Palestinezët civilë duhet të kenë mundësinë të rikthehen në shtëpitë e tyre dhe të rifillojnë jetën në kushte të denja. Kjo është një e drejtë e garantuar nga ligji ndërkombëtar dhe duhet të respektohet nga të gjithë aktorët e përfshirë”, theksoi ministrja.

Ministrja britanike gjithashtu vlerësoi përpjekjet ndërkombëtare për të sjellë paqe dhe stabilitet në rajon, duke veçuar rolin e SHBA-së në negociatat për armëpushimin midis Izraelit dhe Hamasit.

“SHBA-ja ka luajtur një rol të rëndësishëm në ndërmjetësimin e marrëveshjes për armëpushim dhe ne duhet të punojmë së bashku për të siguruar që ky armëpushim të zbatohet plotësisht dhe të bëhet i përhershëm”, deklaroi ajo.

Në përmbyllje, Dodds theksoi domosdoshmërinë e një qasjeje të bashkërenduar ndërkombëtare për të garantuar një zgjidhje të qëndrueshme, duke theksuar se “Gaza është shtëpia e dy milionë palestinezëve dhe mbetet një pjesë integrale e asaj që duhet të bëhet një shtet i ardhshëm palestinez, me palestinezët dhe izraelitët që jetojnë pranë njëri-tjetrit në paqe dhe siguri”.