Dy të mitur 14-vjeçarë nga Shkupi akuzohen për kërcënime të rreme me bombë në shkolla

Sektori për Luftën Kundër Terrorizmit, Ekstremizmit të Dhunshëm dhe Radikalizmit, pranë Departamentit për Luftimin e Krimit të Organizuar dhe të Rëndë, do të paraqesë një raport në Prokurorinë Themelore Publike për ndjekjen e krimit të organizuar dhe korrupsionit, në bazë të të cilit dy të mitur 14-vjeçarë nga Shkupi do të akuzohen për dërgimin e kërcënimeve të rreme me bombë në shkolla.

Të miturit e raportuar më 19.02.2025, nga telefoni celular i njërit prej tyre, dërguan një email me përmbajtje kërcënuese për vendosjen e një bombe në dy shkolla (një fillore dhe një të mesme) në Shkup. Po ashtu, më 21.02.2025, nga telefoni celular i tjetrit, u dërgua një email i ngjashëm për dy shkolla të tjera.

Njësia për Zbulimin dhe Çmontimin e Mjeteve dhe Pajisjeve Eksplozive kreu kontroll anti-terrorist në të gjitha shkollat që kishin marrë kërcënimet, por nuk u gjetën mjete shpërthyese, duke konfirmuar se bëhej fjalë për alarm të rremë.

Përmes hetimeve nga Sektori për Krim Kibernetik, u përcaktua IMEI i pajisjes mobile të përdorur për dërgimin e mesazheve, e cila ishte lidhur me shërbimet e Google më 21.02.2025 përmes një IP-je nga një operator telekomunikacioni në Maqedoninë e Veriut.

Pas verifikimeve shtesë, identiteti i të miturve u konfirmua dhe më 25.02.2025, ata u thirrën në stacionin policor të Çairit. Në prani të prindërve, një inspektori për delikuencën e të miturve dhe një avokati, ata pranuan dhe shpjeguan mënyrën se si kishin kryer veprën.

Pas intervistës zyrtare, për sigurimin e provave, u sekuestruan dy telefona celularë me kartat SIM përkatëse, të cilët ishin përdorur nga të miturit gjatë dërgimit të kërcënimeve.