E reja nga Velesi terrorizon familjen dhe fqinjët – Përfundon në paraburgim

Prokuroria Themelore Publike Veles ka iniciuar procedurë kundër një 24 vjeçare nga Velesi e cila ditëve të fundit ka kryer vepra të shumta penale – Rrezikimi i sigurisë nga neni 144, dhuna ndaj fëmijës nga neni 201-a, si dhe shkaktimi i rrezikut të përgjithshëm nga neni 288 i Kodit Penal.
Siç ka bërë të ditur Prokuroria Publike, ajo i ka kryer veprat në mënyrë të njëpasnjëshme, fillimisht më 10 shkurt, duke ushtruar dhunë në familje, ka kërcënuar babain e saj se do ta vriste. Ajo ka hyrë në shtëpinë e tij duke thyer derën dhe pasi nuk e ka gjetur është drejtuar në stacionin e autobusit ku ka gjetur të dëmtuarin dhe ka kërcënuar hapur me qëllim që ta shqetësojë dhe frikësojë.

Më 12 shkurt, ajo dyshohet se ka ushtruar dhunë fizike ndaj një fëmije të lindur në vitin 2011, duke nisur fillimisht një debat verbal dhe më pas duke e goditur me shqelma në stomak. Më vonë atë ditë, ajo u shfaq para shtëpisë së viktimave me një shkop në dorë dhe kërcënoi vajzën dhe nënën e saj se do t’i vriste, duke i bërë ata të ndiheshin të pasigurt, të kërcënuar dhe të frikësuar.
Gjithashtu, më 14 shkurt, ajo ka vënë re vajzën në oborrin e shtëpisë së familjes dhe ka nisur të gjuajë me gurë viktimën. Vajza ka ikur, ndërsa i dyshuari ka vazhduar të gjuajë me gurë në një parking ku kishte automjete të parkuara dhe studentë që prisnin transportin. Duke vepruar kështu, ajo ka shkaktuar rrezik të konsiderueshëm për jetën dhe gjymtyrët e të pranishmëve dhe ka dëmtuar dy makina.

Duke qenë se ekzistojnë rrethana që tregojnë se e dyshuara mund të arratiset për t’iu shmangur ndjekjes penale, por edhe për shkak të rrezikut të përsëritjes së veprave penale ose kryerjes së veprave që ajo kërcënon të kryejë, ku përfshihen veprime të kundërligjshme dhe kanosje ndaj një vajze 13-vjeçare, prokurori publik i ka paraqitur propozim gjyqtarit për paraburgim. Gjykata ka pranuar propozimin e prokurorisë dhe ka urdhëruar masën e paraburgimit për të dyshuarën.