Protesta e opozitës, Rama: Të frymëzuar nga broçkullat e një të arratisuri në kërkim nga drejtësia

Kryeministri Edi Rama ka bërë një reagim rreth protestës së thirrur nga opozita pasditen e kësaj të shtune.

Në reagimin e tij, kreu i qeverisë thotë se protesta e sotme është “frymëzim nga broçkullat e një të arratisuri nga drejtësia, për korrupsion e fshehje pasurie. Duke nënkuptuar kështu deklaratat e bëra së fundmi nga ish-numri dy i qeverisë së tij, tashmë në arrati, Arben Ahmetaj.

Rama shprehet me ironi se protesta e opozitës duhet përshëndetur pasi, sipas tij, është një pasqyrë e qartë që tregon se Partia Demokratike, siç shprehet ai, nuk mun të jetë alternativë në zgjedhjet e 11 majit.

Sipas kreut të qeverisë, PD do të mund të rilindë vetëm nëse lë pas liderin e saj, Sali Berishën.

Kujtojmë se ky është reagimi i parë i kryeminsitrit rreth protestave të opozitës pasi prej shumë kohësh kishte zgjedhur të mos i komentonte.
EDI RAMA NË PLATFORMËN “X”

“Sot bufi stërplak i kënetës opozitare dilka bashkë me kënetën e tij në protestë dhe frymëzimi i protestës qenkan broçkullat e një të arratisuri në kërkim nga drejtësia për korrupsion e fshehje pasurie.

Duhet përshëndetur kjo protestë, sepse është një pasqyrë e qartë sa s’ka e alternativës së kalbur të një kënete politike humbësish të degraduar, të cilën më 11 maj shqiptarët duhet ta çojnë drejt tharjes, duke votuar të vetmen forcë politike të denjë në Shqipëri, Partinë Socialiste të Shqipërisë.

Vetëm duke e braktisur kënetën e bufit stërplak, demokratët do të krijojnë hapësirë për rilindjen e një opozite politike të denjë për Shqipërinë anëtare të Bashkimit Europian, përndryshe humbjet vetëm do të thellohen edhe përtej 11 majit, kur protestuesit e sotëm do të jo vetëm të humbur për të dhjetën herë radhazi, po edhe me diferencën më të thellë me Partinë Socialiste, qysh nga viti 2013.”