Putin sfidon Eurovizionin, rikthen festivalin: Fton Korenë e Veriut, Kinën e Iranin

Vladimir Putin ka shpallur versionin e vet të konkursit të famshëm të këngës Eurovizion, si një përpjekje për të kundërshtuar atë që ai e quan dekadencë të kulturës moderne perëndimore.

Lideri rus ka firmosur një dekret të hënën për rihapjen e konkursit të këngës Intervision, ekuivalentin e periudhës sovjetike të Eurovizion, të cilin ai ka tentuar ta rikthejë për më shumë se një dekadë.

Senatorja ruse Liliya Gumerova, në një deklaratë për mediat shtetërore, tha se ky konkurrim i ringjallur i këngëve anti-perëndimore “do të promovonte muzikën e vërtetë” dhe “jo vlera të rreme që janë të huaja për çdo person të zakonshëm.”

Ajo gjithashtu e kritikoi Eurovision-in për përfshirjen e interpretueses trans me mjekër, Conchita Wurst, si dhe këngëtarin jo-binjar Nemo, që fitoi vitin e kaluar.

Ndryshe nga Eurovizion, i cili shpesh ka festuar temat dhe performerët LGBTQ+ me veshje të shfrenuara, Intervision do të mbajë një ton më serioz, duke theksuar respektin për “vlerat tradicionale universale, shpirtërore dhe familjare.”

“Artistët nuk mund të interpretojnë këngë që nxisin dhunën, poshtrojnë nderin dhe dinjitetin e shoqërisë dhe është kërkuar që temat politike në tekstet e këngëve të jenë plotësisht të përjashtuara,” thuhet në dokumentet e planifikimit ruse.

Putin ka kërkuar gjithnjë e më shumë që të paraqesë Rusinë si mbrojtëse të vlerave tradicionale të familjes dhe thotë se Perëndimi ka humbur orientimin moral në kërkimin për atë që ai e sheh si individualizëm të tepruar dhe mungesë respekti për traditat fetare.

Ndërkohë, një zëdhënës i Ministrisë së Jashtme të Rusisë ka dënuar hapur konkursin evropian si një “funeral” për Evropën Perëndimore që ka “kaluar çdo orgji, hareje ose ritual blasfemie.”

Në Rusi, rregulla të rrepta tani ndalojnë çdo gjë që konsiderohet si promovim i homoseksualizmit, ndërsa lëvizja ndërkombëtare LGBTQ+ është etiketuar si një organizatë ekstreme.

Më shumë se 25 vende aleatë të Putinit, përfshirë Koreen e Veriut, Kinën, Kubën, Iranin dhe Venezuelën, janë ftuar të marrin pjesë në këtë spektakël këngësh dhe të shijojnë balada anti-“woke” të interpretuara nga influencues pro-Putin.

Vendimi për të rikthyer konkursin e këngës sovjetik vjen pas ndalimit të Rusisë nga Eurovision në vitin 2022, pas invazionit të dhunshëm të Ukrainës.

Rusia ka marrë pjesë në Eurovizion 23 herë që nga viti 1994, por ndërkohë që marrëdhëniet me Perëndimin u përkeqësuan, ajo filloi të shqyrtojë mundësinë e rivendosjes së Intervision, sidomos pas fitores së Wurst në vitin 2014, vitin kur Putin aneksoi Krimenë nga Ukraina.

Intervision fillimisht u lansua nën udhëheqjen e liderit sovjetik Leonid Brezhnev në vitet 1960 si një alternativë e kampit lindor ndaj Eurovizion-it kapitalist, duke bashkuar aleatët e Moskës në Evropën Lindore dhe shtete të tjera komuniste si Kuba.

Përfaqësues të Rusisë thonë se disa shtete kanë shprehur interes për të marrë pjesë në konkursin e ringjallur të Intervision-it.

Sipas dokumenteve të parë nga Reuters, performuesit do të kenë deri në katër minuta për të kënduar këngën e tyre në çdo gjuhë që dëshirojnë.

Fituesi do të bëjë një turne dhe do të fitojë çmim parash.

“Konkursi do të jetë i hapur për pjesëmarrjen e të gjitha vendeve që dëshirojnë të marrin pjesë,” thuhet në dokument, duke shtuar se pjesëmarrësit duhet të “respektojnë traditat kulturore, etike dhe fetare të popujve të tjerë të botës.”