SHBA akuzon Afrikën e Jugut për anti-amerikanizëm, Sekretari Rubio bojkoton takimin e G20 në Johanesburg

Sekretari amerikan i shtetit, Marco Rubio, e ka akuzuar Afrikën e Jugut për “anti-amerikanizëm” dhe ka refuzuar të marrë pjesë në një takim të G20 në Johannesburg këtë muaj, ndërsa marrëdhëniet diplomatike midis dy shteteve po përkeqësohen nën administratën e Donald Trump.

Rubio e bëri njoftimin në X, ku përsëriti pretendimin të pabazuar të presidentit amerikan se Afrika e Jugut po konfiskon prona private, raporton The Guardian.

“Afrika e Jugut po bën gjëra shumë të këqija. Po konfiskon prona private. Po përdor G20 për të promovuar ‘solidaritetin, barazinë dhe qëndrueshmërinë’. Në fjalë të tjera: DEI [diversitet, barazi dhe përfshirje] dhe ndryshimi i klimës,” tha Rubio në një postim në X. “Puna ime është të avancoj interesat kombëtare të Amerikës, jo të shpenzoj paratë e taksapaguesve ose të mbështes anti-amerikanizmin.”

Elon Musk, miliarderi i lindur në Afrikën e Jugut dhe këshilltari i Trump që po udhëheq një sulm drastik ndaj shpenzimeve dhe personelit të qeverisë amerikane, duke përfshirë ndihmën e huaj, u përgjigj me dy emoji të flamurit amerikan.

Refuzimi i Rubio ndaj Afrikës së Jugut, e cila këtë vit është kryesuese e forumit G20 të ekonomive të mëdha, BE dhe Bashkimit Afrikan, vjen pas deklaratës së Trump të dielën, pa prova, se Afrika e Jugut po “konfiskon tokën” dhe se ai po ndalonte financimin amerikan deri në një hetim.

Presidenti i Afrikës së Jugut, Cyril Ramaphosa, muajin e kaluar nënshkroi një ligj që lejon konfiskimin e tokës pa kompensim në kushte të kufizuara. Politikanët kanë argumentuar se kjo është e ngjashme me vende të tjera, përfshirë SHBA, ku konfiskimi i tokës me “kompensim të drejtë” lejohet për projekte publike si ndërtimi i rrugëve.

Më shumë se tri dekada pas përfundimit të apartheitit, pronësia e tokës mbetet e përqendruar në pakicën e bardhë të Afrikës së Jugut. Qeveria ka blerë dhe shpërndarë 7.8 milionë hektarë (19 milionë akra), ndërsa gjykatat kanë urdhëruar një numër të kufizuar kthimesh të tokës për njerëzit që janë shpërngulur nga apartheidi.

“Nuk ka konfiskim arbitrar të tokës/ pronës private,” tha ministri i Jashtëm i Afrikës së Jugut, Ronald Lamola, në X. “Presidenca jonë e G20, nuk është e kufizuar vetëm në ndryshimin e klimës, por gjithashtu në trajtimin e barabartë për kombet e Jugut, duke siguruar një sistem global të barabartë për të gjithë. Ne mbetemi të angazhuar për të bashkëpunuar me qeverinë e SHBA.”

Marrëdhënia e SHBA me Afrikën e Jugut u përkeqësua nën presidentin e mëparshëm të SHBA, Joe Biden, kur Afrika e Jugut refuzoi të merrte anë në luftën Rusia-Ukrainë, por vazhdoi të luante një rol aktiv në bllokun Brics, i cili fillimisht përfshinte Brazilin, Rusinë, Indinë dhe Kinën.