Trump: Zelensky mbështetet nga 4% e ukrainasve, janë të nevojshme zgjedhjet
Presidenti amerikan Donald Trump deklaroi se Ukraina ka nevojë për zgjedhje para nënshkrimit të një marrëveshjeje paqeje.
“Kemi një situatë ku nuk ka pasur zgjedhje në Ukrainë, ku kemi një gjendje të jashtëzakonshme, një gjendje efektive të jashtëzakonshme,” i tha Trump gazetarëve, kur u pyet për kërkesat e Rusisë që të nënshkruhet një marrëveshje paqeje vetëm pas zgjedhjeve në Ukrainë.
Trump tha se “mbështetja për Zelenskyn në Ukrainë është zvogëluar në katër përqind” dhe shtoi se populli i Ukrainës duhet të thotë “e dini, ka kaluar shumë kohë që nga zgjedhjet.”
Ai theksoi se kjo nuk ka të bëjë me atë që thotë Rusia për zgjedhjet, por me pikëpamjen e tij personale dhe atë të “shumë vendeve të tjera.”
Gjithashtu, Trump shprehu se Ukraina është përgjegjëse për konfliktin, i cili filloi në këtë vend para tre vjetësh, duke thënë se Kievi mund të kishte arritur një marrëveshje dhe të kishte shmangur të gjithë këtë.
“Ju nuk duhej ta fillonit këtë,” tha Trump.
Presidenti amerikan shtoi se nuk do të kundërshtonte dërgimin e forcave paqeruajtëse evropiane në Ukrainë në rast të një marrëveshjeje paqeje.
“Nëse kjo është ajo që ata duan, është shumë mirë. Unë jam plotësisht për,” tha Trump, duke theksuar se nuk do të dërgonte trupa amerikane në Ukrainë.
