Kaos në Turqi: Ndalohen tubimet në 3 qytetet më të mëdha, arrestohen 1130 protestues

Autoritetet turke sot ndaluan përkohësisht të gjitha tubimet publike në tre qytetet më të mëdha të Turqisë dhe njoftuan se rreth 1,130 demonstrues janë arrestuar që nga fillimi i valës së protestave në të gjithë Turqinë.

“1,133 të dyshuar janë arrestuar në lidhje me aktivitete të paligjshme të kryera midis 19 dhe 23 marsit 2025”, konfirmoi ministri i Brendshëm turk Ali Yerlikaya në llogarinë e tij X.net.

Ndërkohë, opozita turke, e inkurajuar nga protestat masive në të gjithë vendin për arrestimin e kryebashkiakut të Stambollit Ekrem Imamoglu, shprehu shpresën se do të ruhet momenti i pakënaqësisë mes qytetarëve.

Liderët e opozitës turke kanë bërë thirrje për bojkot të stacioneve televizive dhe kompanive që, sipas tyre, “injorojnë momentin aktual” , raporton Reuters.

Për shkak të arrestimit të kryebashkiakut të Stambollit Ekrem Imamoglu, i cili konsiderohet si rivali më serioz politik i presidentit Recep Tayyip Erdogan, Turqia po tronditet nga protestat më të mëdha në rrugë në 10 vitet e fundit.

Imamoglu është në burg në pritje të gjyqit për akuzat për korrupsion që ai i mohon me forcë.