Kërcënimi i Trump se do të bombardojë Iranin, reagon republika islamike

Teherani ka paralajmëruar Uashingtonin se do të përgjigjet “me vendosmëri dhe menjëherë” ndaj çdo sulmi të mundshëm, pas kërcënimeve të fundit nga presidenti amerikan, Donald Trump. Mesazhi i Iranit iu përcoll Shteteve të Bashkuara përmes të Ngarkuarit me Punë të Zvicrës në Teheran, që shërben si ndërmjetës diplomatik mes dy vendeve.

Sipas televizionit shtetëror iranian, diplomati zviceran u thirr në Ministrinë e Jashtme të Iranit në përgjigje të agresionit të vazhdueshëm të Izraelit në rajon dhe kërcënimeve të Trumpit. Autoritetet iraniane i dorëzuan një notë zyrtare kundërshtimi, duke theksuar se çdo veprim ushtarak i SHBA-së do të përballet me një kundërpërgjigje të menjëhershme.

Tensionet mes dy vendeve janë përshkallëzuar pas deklaratave të presidentit Trump më 7 mars, kur ai njoftoi se i kishte dërguar një letër udhëheqësit iranian, Ayatollah Ali Khamenei, duke e kërcënuar dhe ftuar për negociata. Khamenei e refuzoi ofertën, duke e cilësuar atë si një përpjekje të SHBA-së për të imponuar dominimin e saj mbi Iranin.

Në përgjigje, Irani dërgoi një letër përmes Omanit më 27 mars, duke theksuar se nuk do të zhvillonte bisedime të drejtpërdrejta me SHBA-në për sa kohë që Trump vazhdon kërcënimet. Megjithatë, Teherani la të hapur mundësinë për negociata indirekte përmes ndërmjetësve, por vetëm për çështjen bërthamore, duke përjashtuar diskutimet mbi kapacitetin e tij mbrojtës.

Në një deklaratë të fundit, Trump paralajmëroi se nëse Irani nuk arrin një marrëveshje me SHBA-në, ai do të urdhërojë një sulm ushtarak “siç nuk është parë më parë”. Në kundërpërgjigje, Khamenei deklaroi se Irani nuk e sheh të mundur që Trump ta realizojë këtë kërcënim, por paralajmëroi se çdo agresion do të hasë në një përgjigje të fuqishme nga Teherani.