Punonjësja e qendrës sociale e qëlluar me armë është në gjendje të mirë, kolegët protestojnë duke kërkuar siguri fizike
Punonjësit e Qendrës për Punë Sociale në Tetovë do të protestojnë sot në orën 12:30 para godinës së institucionit, në shenjë mbështetjeje për kolegen e tyre, e cila u qëllua me armë dje në ambientet e Qendrës për Punë Sociale në Prilep. Për ngjarjen penale, ku u qëllua me armë një punonjëse sociale 38-vjeçare në gjoks, është arrestuar një burrë 50-vjeçar, i cili, sipas të dhënave jozyrtare të gazetës “Sloboden Peçat”, kishte histori të sjelljes së dhunshme, fillimisht ndaj ish-bashkëshortes së tij. Në atë proces kishte ndërhyrë një ekip nga Qendra për Punë Sociale, ku bënte pjesë edhe punonjësja sociale e plagosur, ndaj së cilës agresori kreu aktin me motiv hakmarrjeje. Ai e kishte përndjekur dhe kërcënuar viktimën për 5 vjet, për çka ishin ngritur edhe procedura penale, por kishte arritur të arratisej nga institucioni psikiatrik ku po trajtohej me masë të detyrueshme psikiatrike.
Përveç punonjëses sociale që u plagos, agresori shtiu edhe ndaj drejtorit të Qendrës për Punë Sociale në Prilep, i cili nuk u lëndua. Ai u arrestua.
Paqartësi për sigurinë në institucionet psikiatrike
Nuk është e qartë se si ai mundi të arratisej nga një institucion i mbyllur, duke ngritur pyetje mbi sigurinë në atë institucion shëndetësor publik. Prokuroria ka deklaruar se sulmuesi e kishte përndjekur viktimën për një kohë të gjatë.
Drejtori i spitalit të Prilepit, Dr. Kire Jonoski, për gazetën “Sloboden Peçat” tha se punonjësja sociale e plagosur është e shtruar në spital dhe këtë mëngjes ndodhet në gjendje të mirë dhe të stabilizuar. Një nga plumbat e ka humbur objektivin dhe ka përfunduar në murin e zyrës, ndërsa tjetri ka përfunduar nën lëkurë, në zonën e brinjës së dymbëdhjetë.
Punonjësit e Tetovës kërkojnë mbrojtje urgjente
Punonjësit e Qendrës për Punë Sociale në Tetovë sot në orën 12:30 do të protestojnë para godinës së shërbimit. Ata i kanë dërguar një kërkesë Ministrisë së Punës dhe Politikës Sociale, Demografisë dhe Rinisë për marrjen e masave urgjente për mbrojtjen e punonjësve socialë.
“Nuk ka punonjës social që nuk përjeton presione,” thuhet në letrën e tyre, ku shprehet shqetësimi dhe revolta për rritjen e rasteve të dhunës ndaj punonjësve të qendrave për punë sociale. Ata kërkojnë masa sistematike për mbrojtjen e tyre gjatë ushtrimit të detyrës.
“Rasti i fundit, sulmi ndaj koleges sonë në Prilep, është tregues i qartë se janë të nevojshme ndryshime të menjëhershme sistemore për mbrojtjen e punonjësve socialë. Ata përballen çdo ditë me kërcënime, sulme verbale dhe fizike, ndërsa kryejnë detyrën për të mbrojtur kategoritë më të cenueshme të qytetarëve. Mungesa e masave të sigurisë në institucionet ku punojmë jo vetëm që rrezikon seriozisht shëndetin tonë fizik dhe mendor, por edhe cilësinë e shërbimeve që ne ofrojmë,” thuhet në letrën drejtuar Ministrisë.
Punonjësit socialë kërkojnë masa urgjente. Së pari, ata kërkojnë ndryshime ligjore, sipas të cilave sulmi ndaj një punonjësi social të trajtohet si sulm ndaj një zyrtari shtetëror dhe kjo të vlejë për të gjitha format e ngacmimit, përfshirë dhunën psikologjike dhe fizike, si nga subjektet e brendshme ashtu edhe ato të jashtme.
Kërkesat e tyre përfshijnë:
Sigurim fizik, pra prani të detyrueshme të rojeve të sigurisë në të gjitha Qendrat për Punë Sociale.
Ofrimin e mbështetjes psikologjike falas për punonjësit që kanë përjetuar dhunë.
Përmirësimin e kushteve të punës dhe rritjen e pagave pa kushtëzim me përvojën e punës.
Sanksione më të rrepta për agresorët dhe procesim të menjëhershëm të rasteve të sulmeve ndaj punonjësve socialë.
Në letrën drejtuar Ministrisë së Punës, ata njoftojnë se sot do të dalin në protestë.
Tubimi publik i punonjësve socialë në Tetovë ka për qëllim të shprehë pakënaqësinë e tyre dhe të kërkojë përgjegjësi institucionale.
“Presim që Ministria të reagojë menjëherë dhe të marrë masa konkrete për mbrojtjen e punonjësve socialë,” thuhet në letrën drejtuar ministrisë përkatëse.
