Samiti për Ukrainën/ Ministri francez flet për rrezikun e luftës në Evropë: Kërcënimi vazhdon të na afrohet!

Ministri i Jashtëm francez Jean-Noël Barrot flet për rrezikun e lartë të një lufte në Evropë.

Në një intervistë për radion France Inter, ai thotë se rreziku i një lufte në Evropë nuk ka qenë kurrë kaq i lartë, sepse sipas tij kërcënimi ka 15 vite që po i afrohet Evropës.

I pyetur nga France Inter për t’iu përgjigjur akuzës së Trump se Zelensky “po luante bixhoz me Luftën e Tretë Botërore”, Barrot pranoi rrezikun e përhapjes së konfliktit, shkruan BBC.

“Asnjëherë rreziku i një lufte në Evropë, në Bashkimin Evropian nuk ka qenë kaq i lartë… kërcënimi vazhdon të na afrohet, vija e frontit vazhdon të na afrohet më shumë”, tha ai.

Barrot tha se samiti i së dielës në Londër funksionoi si “zgjim për evropianët që refuzuan të shihin realitetin e gjërave”, të cilët, thotë ai, tani janë të bindur se kontinenti duhet të sigurojë mbrojtjen dhe sigurinë e tij.

Në të ardhmen e afërt, ai thotë se është “e mundur” që bisedat midis Presidentit ukrainas Volodymyr Zelensky dhe Presidentit të SHBA Donald Trump të rifillojnë, duke thënë se ekziston një “vetëdije e përbashkët” e interesave midis Ukrainës, Shteteve të Bashkuara dhe Evropës për t’i dhënë fund “dëshirave imperialiste”.

“Ne duhet të qëndrojmë të bashkuar në qëllimin tonë për t’i dhënë fund luftës së agresionit të Rusisë”, tha ai.