Shpërthen Starship i Elon Musk, pezullohen fluturimet në disa aeroporte

Anija kozmike Starship e SpaceX shpërtheu vetëm disa minuta pas ngritjes nga Teksasi, duke penguar përpjekjen për të vendosur satelitë testues. Ky është dështimi i dytë radhazi në programin e raketave për Marsin, të udhëhequr nga Elon Musk.

Anija kozmike u shpërbë pak pasi filloi të rrotullohej në mënyrë të pakontrolluar, ndërsa motorët i ishin fikur, gjë që u konfirmua gjatë transmetimit të drejtpërdrejtë të SpaceX. Ky dështim vjen pak më shumë se një muaj pas shpërthimit të fluturimit të shtatë të Starship. Dy dështime të njëpasnjëshme ndodhën në fazat e hershme të misionit, megjithëse më parë SpaceX kishte pasur përparim të qëndrueshëm.

Raketa 123 metra e lartë u ngrit rreth orës 18:30 me orën lindore nga kompleksi i lëshimit të SpaceX në Boca Chica, Teksas. Faza e saj e parë, përforcuesi Super Heavy, u kthye me sukses në Tokë siç ishte planifikuar. Megjithatë, vetëm disa minuta më vonë, transmetimi i drejtpërdrejtë tregoi se pjesa e sipërme e Starship po rrotullohej në mënyrë të pakontrolluar në hapësirë, ndërsa të dhënat tregonin se motorët po fikesin gradualisht. Pak më pas, SpaceX konfirmoi se kishte humbur kontaktin me anijen.

“Për fat të keq, kjo na ndodhi edhe herën e kaluar, kështu që të paktën tani kemi përvojë,” tha Dan Huot, zëdhënës i SpaceX gjatë transmetimit.

Raketa nuk mbante astronautë. Pas shpërthimit, SpaceX ndërpreu transmetimin dhe nuk dha informacione për vendndodhjen e mundshme të mbetjeve.

Në një deklaratë zyrtare, kompania njoftoi se “anija përjetoi një shpërbërje të shpejtë dhe të paplanifikuar dhe kontakti u humb.” Ata shtuan se ekipi i tyre po bashkëpunon me autoritetet e sigurisë dhe do të analizojë me kujdes të dhënat për të zbuluar shkakun e shpërthimit.

“Çdo sukses vjen nga ajo që mësojmë, dhe fluturimi i sotëm do të na sigurojë informacione të vlefshme për të rritur besueshmërinë e Starship,” thanë nga SpaceX.

Për shkak të mbetjeve që ranë në pjesë të Karaibeve, Administrata Federale e Aviacionit të SHBA (FAA) pezulloi përkohësisht fluturimet komerciale në aeroportet e Miami, Fort Lauderdale, Palm Beach dhe Orlando, të paktën deri në orën 20:00 me orën lindore. Gjithashtu, fluturimet u devijuan mbi zonën e Ishujve Turks dhe Caicos.

FAA nisi një hetim zyrtar dhe njoftoi se SpaceX duhet të përcaktojë shkakun e dështimit dhe të marrë miratimin e agjencisë përpara se Starship të fluturojë përsëri.

Ky dështim i ri përbën një tjetër goditje për planet e Elon Musk. Qëllimi i tij është të zhvillojë një raketë që mund të lëshojë grupe të mëdha satelitësh, por edhe të transportojë njerëz në Hënë dhe Mars.