Trump: Nëse Kanadaja dhe BE-ja bashkohen për të na dëmtuar, do të vendos tarifa shumë më të larta ndaj tyre

Presidenti i SHBA, Donald Trump tha të enjten se tarifa më të mëdha mund të vendosen ndaj Bashkimit Evropian dhe Kanadasë, nëse të dy punojnë së bashku “për t’i bërë dëm ekonomik SHBA-së”.

“Nëse Bashkimi Evropian punon me Kanadanë për t’i bërë dëm ekonomik SHBA-së, tarifa në shkallë të gjerë, shumë më të mëdha se sa është planifikuar aktualisht, do të vendosen mbi to, për të mbrojtur mikun më të mirë që secili prej këtyre dy vendeve ka pasur ndonjëherë”, tha ai në një postim në Truth Social.

Të mërkurën, Trump zbuloi një tarifë 25% për automjetet e importuara, duke zgjeruar një luftë tregtare globale dhe duke nxitur kritika dhe kërcënime për hakmarrje nga aleatët e prekur të SHBA.

Presidentja e Komisionit Evropian, Ursula von der Leyen e përshkroi masën si “të keqe për bizneset, më keq për konsumatorët”, ndërsa kryeministri kanadez Mark Carney i etiketoi tarifat një “sulm të drejtpërdrejtë” ndaj punëtorëve kanadezë dhe tha se po konsideroheshin masa hakmarrëse.

Taksat e reja për veturat dhe kamionët e lehtë do të hyjnë në fuqi më 3 prill, një ditë pasi Trump planifikon të shpallë tarifa reciproke që synojnë vendet përgjegjëse për pjesën më të madhe të deficitit tregtar të SHBA.

Ato vijnë në krye të detyrimeve të prezantuara tashmë për çelikun dhe aluminin, dhe për mallrat nga Meksika, Kanadaja dhe Kina.

BE-ja ka thënë se do të shtyjë grupin e parë të kundërmasave deri në mesin e prillit, duke përfshirë një tarifë 50% për burbonin amerikan.

Si përgjigje, Trump kërcënoi se do të vendoste një tarifë 200% për të gjitha verërat dhe produktet e tjera alkoolike nga BE nëse blloku vazhdon me këtë.