Vjedhjet rekord e bëjnë Korenë e Veriut mbajtësen e tretë më të madhe të Bitcoin-it

Koreja e Veriut vlerësohet të jetë mbajtësja e tretë më e madhe e Bitcoin-it në botë, raportoi të martën gazeta The Times.
SHBA-ja ka akuzuar Phenianin për orkestrimin e një vjedhjeje të pasurive dixhitale me vlerë 1.5 miliardë dollarë dhe ka pohuar se gati gjysma e të ardhurave të Koresë së Veriut në valutë të huaj vijnë nga “aktivitetet kibernetike keqdashëse”.

Prej dekadash, vendi ka përballuar sanksione të ashpra ekonomike që e pengojnë të marrë pjesë në tregtinë ndërkombëtare. Për të siguruar burime për programet e tij të mbrojtjes, të bazuara në nevojën për një ushtri të fuqishme dhe një mjet parandalues bërthamor, Pheniani ka përdorur strategji novatore, përfshirë kriptovalutat, për të anashkaluar këto kufizime.

Ky vlerësim bazohet në një analizë të kryer nga Arkham Intelligence, një firmë që përdor inteligjencën artificiale për të gjurmuar pronësinë e portofolave të kriptomonedhave anonime. Arkham vlerëson se grupi Lazarus, një kolektiv hakerësh i lidhur me qeverinë e Koresë së Veriut, zotëron rreth 1.2 miliardë dollarë në Bitcoin. Krahasimisht, vlerësohet se asetet e Bitcoin-it të SHBA-së kapin shifrën mbi 17 miliardë dollarë, ndërsa ato të Mbretërisë së Bashkuar arrijnë mbi 5 miliardë dollarë.

Muajin e kaluar, FBI-ja akuzoi grupin Lazarus për vjedhjen e rreth 1.5 miliardë dollarëve në monedhë dixhitale nga Bybit, një platformë këmbimi e kriptovalutave me bazë në Dubai që shërben për mbi 60 milionë përdorues. Raportohet se hakerët shfrytëzuan një transferim rutinë midis portofolave dixhitalë për të zhdukur rreth 401,000 Ethereum. Byroja deklaroi se priste që Lazarus të pastronte përfitimet e paligjshme përmes monedhave të ndryshme dixhitale.