Algjeria dëbon më shumë se 1800 migrantë në kufirin me Nigerin, mes tensioneve rajonalev

Dëbime masive janë regjistruar në Algjeri në fillim të prillit, duke shtuar ndjeshëm tensionet me fqinjët e saj jugorë, të cilët aktualisht drejtohen nga junta ushtarake që kanë përmbysur qeveritë e zgjedhura më parë të afërta me Algjerinë. Autoritetet algjeriane kanë dëbuar mbi 1800 migrantë dhe i kanë braktisur në një zonë të largët shkretëtinore në kufi me Nigerin, e njohur si “Pika Zero”, sipas organizatës për të drejtat e emigrantëve, Alarmphone Sahara.

Sipas Abdou Aziz Chehou, koordinatori kombëtar i kësaj organizate, 1,845 migrantë pa dokumentacion ligjor u larguan nga qytete të ndryshme algjeriane dhe mbërritën në qytetin kufitar të Nigerit, Assamaka, më 19 prill. Kjo shifër çon numrin e përgjithshëm të migrantëve të dëbuar këtë muaj në mbi 4,000, ndërsa nuk përfshihen ata që mund të kenë tentuar të rikthehen në Algjeri.

Kriza vjen në një kohë kur marrëdhëniet e Algjerisë me fqinjët jugorë – Burkina Fason, Malin dhe Nigerin – janë përkeqësuar ndjeshëm. Të tre vendet kanë tërhequr ambasadorët e tyre nga Algjeria, duke përmendur mosmarrëveshje mbi sigurinë kufitare. Ndërkohë, Algjeria mbetet një pikë kyçe tranziti për migrantët që ikin nga varfëria, lufta apo ndikimet e ndryshimeve klimatike dhe synojnë të arrijnë Evropën.

Megjithatë, rritja e patrullimeve detare dhe kontrollet e forta kufitare kanë bllokuar shumë në vendet tranzit, ku ndihma humanitare është e kufizuar dhe kushtet e të drejtave të njeriut mbeten të diskutueshme. Vetëm gjatë vitit 2024, Alarmphone Sahara regjistroi mbi 30,000 dëbime nga Algjeria. Dëbime të ngjashme janë raportuar edhe në Marok, Tunizi dhe Libi.

Zyrtarët algjerianë dhe ata nigerianë nuk kanë dhënë komente për dëbimet e fundit, të cilat raportohen rrallë në median zyrtare algjeriane. Në të kaluarën, autoritetet në Niger kanë kritikuar veprime të tilla si shkelje të marrëveshjes së vitit 2014, e cila parashikon që vetëm shtetasit e Nigerit të mund të dëbohen në atë drejtim.