Arsenali ndalet nga Crystal Palace, Liverpooli veç një pikë larg titullit

Arsenal ka humbur pothuajse të gjitha gjasat për titullin e Premierligës, pas një barazimi zhgënjyes 2-2 ndaj Crystal Palace në “Emirates Stadium”, në kuadër të javës së 34-të të kampionatit anglez.

Ndeshja nisi në mënyrë ideale për “Topçinjtë”, që kaluan në epërsi që në minutën e 3-të me një goditje të saktë nga mbrojtësi Kiwior, duke ngritur entuziazmin te tifozët vendas. Megjithatë, Crystal Palace reagoi fuqishëm dhe barazoi në minutën e 27-të me një gol nga Eberechi Eze.

Skuadra e Mikel Artetës riktheu avantazhin në minutën e 42-të me një finalizim të saktë të Leandro Trossard, duke mbyllur pjesën e parë me epërsi 2-1. Por pavarësisht dominimit në pjesën e dytë, londinezët nuk arritën ta mbyllin ndeshjen. Dhe në minutën e 83-të, Jean-Philippe Mateta goditi për Crystal Palace, duke i siguruar një pikë të çmuar mysafirëve.

Ky rezultat lë pasoja të mëdha për Arsenalin, që tashmë gjendet në vendin e dytë me 67 pikë, duke lënë Liverpoolin të shkëputet në krye me 79 pikë dhe një ndeshje më pak të zhvilluar.

Ndërkohë, Crystal Palace, me këtë barazim të vlefshëm, ngjitet në vendin e 12-të me 45 pikë, duke forcuar pozitat e saj larg zonës së rrezikut.