Barcelona buzëqesh, Real Madrid rrëshqet në garën për titull

Real Madrid ka pësuar një humbje të dhimbshme në shtëpi përballë Valencias me rezultat 1:2, në një ndeshje dramatike të vendosur në sekondat e fundit nga goli i Hugo Duros. Kjo disfatë për “Los Blancos” në kampionat i ka lënë ata tri pikë prapa liderit Barcelona, që ka edhe një ndeshje më pak të zhvilluar.

Ndeshja nisi në mënyrë të zjarrtë për Realin, që kishte rastin ideal për të kaluar në epërsi në minutën e 13-të, kur fituan një penallti. Megjithatë, braziliani dështoi ta realizojë nga pika e bardhë, duke e shpërdoruar mundësinë më të mirë për vendësit.

Vetëm dy minuta më vonë, Valencia shfrytëzoi momentin e pasigurisë së madrilenëve dhe kaloi në epërsi. Diakhaby shënoi në minutën e 15-të, duke i dhënë avantazhin skuadrës mysafire.

Real Madrid reagoi në pjesën e dytë dhe arriti të barazojë rezultatin në minutën e 50-të, kur Jude Bellingham asistoi për Vinicius Junior, i cili u shlye për penalltinë e humbur dhe e riktheu baraspeshën.

Kur gjithçka dukej se do të mbyllej në barazim, Valencia shënoi goditjen e fundit në minutën e 90+5. Hugo Duro, u gjend në vendin e duhur në kohën e duhur dhe i dha skuadrës së tij një fitore spektakolare në “Santiago Bernabéu”.

Kjo humbje e rëndë i kushton shumë Real Madridit në garën për titull. Madrilenët tani kanë 63 pikë dhe ndodhen në vendin e dytë, tri më pak se Barcelona, e cila ka një ndeshje më pak të zhvilluar. Në anën tjetër, Valencia ngjitet në kuotën e 34 pikëve dhe del nga zona e rrezikut, duke u ngjitur në vendin e 15-të.

Gara për titullin mbetet e hapur, ndërsa Valencia dëshmoi se është e gatshme të luftojë deri në fund për qëndrimin në elitë – madje edhe në stadiumin më të frikshëm të Spanjës.