Barcelona nuk e vulos titullin, ndalet nga Betisi

Barcelona nuk shkoi më shumë se një barazim 1:1 ndaj Real Betisit, në një ndeshje ku katalanasit nisën furishëm, por nuk arritën ta mbyllin me tre pikë.

Megjithatë, ky rezultat i jep një avantazh të lehtë në krye të tabelës, pasi rivalët e drejtpërdrejtë për titull, Real Madridi, u mposhtën 1:2 nga Valencia po gjatë së njëjtës mbrëmje.

Sfida nisi në mënyrën më të mirë për Barcelonën. Vetëm në minutën e 7-të, Gavi realizoi një gol të bukur, duke çuar në festë tifozët vendas.

Por reagimi i Betisit nuk vonoi. Në minutën e 17-të, ishte Natan që u gjend i lirë pas një goditjeje nga këndi dhe e dërgoi topin në rrjetë për rezultatin përfundimtar 1:1.

Pjesa tjetër e ndeshjes u karakterizua nga dominimi territorial i Barcelonës dhe disa tentativa të rrezikshme, por mungoi saktësia në finalizim, ndërsa Betisi u mbrojt me disiplinë dhe mori një pikë të vlefshme për objektivat e veta evropiane.

Barazimi i Barcelonës, në rrethana të tjera, mund të konsiderohej një hap i gabuar, por humbja e Real Madridit ndaj Valencias i jep vlerë kësaj pike të fituar.

Katalanasit ruajnë kreun me katër pikë më shumë, ndërsa Betisi vazhdon të qëndrojë në garën për zonën Champions me 48 pikë, duke shfaqur një formë të qëndrueshme këtë sezon.