Gashi me rastin e Ditës së Ndërgjegjësimit për Autizmin: Bukuria e jetës është në pasurinë e diversiteteve tona

Në Ditën Botërore të Ndërgjegjësimit për Autizmin – 2 Prill, Kryetari i Kuvendit, Afrim Gashi, ka pritur në kabinetin e tij një grup fëmijësh, prindërish, mësimdhënësish dhe përfaqësuesish të shoqatave të ndryshme, të cilëve u ka dërguar mesazh se takimet e tilla janë me rëndësi të paçmueshme në ndërtimin e shoqërisë me mundësi të barabarta për të gjithë.

Takimet e tilla, tha Kryetari Gashi, e inkurajojnë dëgjimin dhe mësimin, dhe mbi të gjitha e theksojnë rëndësinë e pranimit dhe respektimit të diversiteteve.

“Çdo fëmijë që ishte mes nesh sot na tregoi se çdo individ, pavarësisht nga dallimet, ka botën e tij unike, ngjyrat e tij, potencialin e pafund dhe shpirtin që meriton shans për të fluturuar. Kjo ngjarje, përveç momentit të paharrueshëm, është gjithashtu mundësi për të ndërtuar shoqërinë më të ndjeshme dhe të bashkuar për ata që na kujtojnë se bukuria e jetës është në pasurinë e diversiteteve”, theksoi Gashi, theksohet në kumtesën e Kabinetit të tij.

Gashi i dëgjoi me vëmendje shqetësimet dhe sfidat e prindërve dhe mësimdhënësve, duke premtuar se brenda mundësive të tij do të ndërmerrte gjithçka që është e nevojshme për përmirësimin dhe ngritjen e standardeve të jetesës së personave me autizëm. Ai theksoi se Kuvendi, me angazhim dhe respekt, mbetet i hapur për të dëgjuar dhe kuptuar më mirë nevojat dhe potencialin e personave me autizëm.