Grupi Houthi shënjestron një lokacion ushtarak izraelit në Tel Aviv

Grupi Houthi i mbështetur nga Irani në Jemen njoftoi sot se ka vënë në shënjestër një lokacion ushtarak izraelit në Tel Aviv me një dron, transmeton Anadolu.

Grupi tha se operacioni është kryer në mbështetje të popullit palestinez.

Zëdhënësi ushtarak i Houthive, Yahya Saree, duke folur në televizionin al-Masirah, tha se forcat jemenase shënjestruan me dron një lokacion ushtarak izraelit në zonën e pushtuar Yafa (Tel Aviv) me dron “të tipit Yafa”.

Izraeli raportoi më parë se kishte pritur një dron “nga lindja” mbi rajonin Arava në jug.

Saree tha se një dron amerikan “Giant Shark F360” që po kryente vëzhgime për SHBA-në dhe Izraelin, u rrëzua nga sistemet e mbrojtjes ajrore të Houthive në Saada tëJemenit, në një sulm të veçantë.

“Forcat tona do të vazhdojnë të kryejnë detyrat e tyre në mbështetje të popullit të shtypur palestinez derisa të pushojnë sulmet dhe të hiqet bllokada në Rripin e Gazës”, shtoi ai.

Pas ndalimit të sulmeve me raketa dhe dron mbi Izraelin pas një marrëveshjeje armëpushimi dhe shkëmbimi të të burgosurve në Gaza në janar, Houthit rifilluan të synojnë Izraelin pasi Tel Avivi theu armëpushimin muajin e kaluar.