Incidente me simbolet e Kosovës në Serbi, huliganët djegin flamurin

Në Kongresin e UEFA-s që u mbajt këtë të Enjte në Beograd pati edhe një incident. Kosova mori pjesë me simbolet shtetërore, por në momentin kur delegacioni kosovar nuk ishte në sallë, organizatorët serbë hoqën flamurin e saj nga salla. Kjo solli reagimin e federatës së Kosovës.

“Theksojmë se Kosova ishte e përfaqësuar zyrtarisht me simbolet e saj shtetërore, njësoj si çdo anëtare tjetër e UEFA-s. Çdo veprim i mundshëm në përfundim të mbledhjes, kur presidenti i FFK-së nuk ishte më në sallë, nuk e ndryshon faktin se Kosova ishte dhe mbetet pjesë e barabartë e këtij organizimi.”

Organizatorët jo vetëm që nuk kërkuan falje për incidentin, por theksuan se nuk e njohin Kosovën si shtet.

“Reaguam shpejt dhe me vendosmëri dhe me përgjegjësi të plotë informojmë opinionin se në Kongresin e UEFA-s në Beograd nuk ka flamuj të të ashtuquajturës Kosovë.”

Pavarësisht kësaj situate, kreu i UEFA-s, Aleksander Čeferin vlerësoi si një shembull bashkëpunimi organizimin e Europianit të 21-vjeçarëve në 2027 nga Shqipëria dhe Serbia.

“Futbolli është më shumë se një sport, është një pasqyrë dhe një model i shoqërisë. Ai flet një gjuhë universale që kalon përtej kufijve, bashkon komunitetet dhe frymëzon ëndrra dhe për këtë arsye, ne e shohim turneun e finaleve të EURO U21 në 2027, që do të zhvillohet në Shqipëri dhe Serbi, si një rikujtesë të shkëlqyer se nuk ka kufij në futbollin europian.”

Ky turne do të mbahet në Qershor të 2027-ës me finalen që do të luhet në stadiumin Arena Kombëtare.