Inzaghi ankohet në referim, pas humbjes nga Bologna

Simone Inzaghi u ankua për një gabim arbitrar që, sipas tij, bëri që fitorja e Bolognës të mos ishte e drejtë, por këmbëngul se Interi është ende në garë për titullin. “Kampionati nuk mbaron këtu,” tha trajneri pas ndeshjes dramatike.

Inter humbi me rezultatin 2-1 ndaj Bolognës, me një gol spektakolar të Riccardo Orsolinit në minutat shtesë, që e rihapi garën për titull, veçanërisht pas fitores së Napolit ndaj Monzës një ditë më parë.

Tensioni ishte i ndjeshëm në fushë dhe në pankina, sidomos pas fishkëllimës finale. Inzaghi theksoi një moment të caktuar që, sipas tij, ndikoi drejtpërdrejt në rezultatin përfundimtar:

“Pati tension për atë rimënie fundore, e cila u krye 12-13 metra më përpara nga vendi ku topi doli. Kjo është një e dhënë objektive,” tha ai për DAZN.
“Gjithsesi, mund ta kishim menaxhuar më mirë situatën – dy nga lojtarët tanë kërcyen për topin, dhe duhej të ishte vetëm një.”

Gjatë ndeshjes pati edhe përplasje mes pankinave. Arbitri përjashtoi trajnerin e Bolognës, Vincenzo Italiano, dhe ndihmësin e Inzaghit, Massimiliano Farris, ndërsa Tucu Correa mori të verdhë nga stoli për protesta.

“Arbitri bëri më të mirën e tij, por topi doli afër këmbëve të mia dhe rimënia u ekzekutua përpara pankinës së Bolognës. Kjo nuk mund të jetë justifikim – duhet të kishim qenë më të përqendruar. Jemi të zhgënjyer sepse harxhuam shumë energji, dhe të humbasësh në këtë mënyrë dhe në këtë moment, është e dhimbshme. Topi nuk duhet të kishte shkuar te Orsolini.”

Inzaghi përmendi edhe lodhjen e skuadrës pas barazimit 2-2 në çerekfinalen e Ligës së Kampionëve kundër Bayern Munich, duke shtuar:

“Bologna ishte e përgatitur, por edhe ne gjithashtu. Ishte një ndeshje e barabartë, prandaj kjo humbje dhe mënyra si ndodhi, dhemb. Do ngrihemi sërish. Sezoni nuk përfundon në Bologna. Duhet të pranojmë gjithçka – edhe një gol të tillë.”

Ai foli edhe për reagimin e lojtarëve në dhomat e zhveshjes:

“U përpoqa t’u tregoja si e pësonim golin dhe se si duhej të kishim mbrojtur më mirë. Por ata vazhdonin të thoshin se rimënia u bë 12 metra më përpara dhe se nuk ishte e drejtë. Janë profesionistë të mëdhenj dhe do ta kuptojnë që duhet të reagojmë dhe të mbrohemi më mirë.”

Përveç humbjes, Interi mori edhe dy goditje të tjera: Alessandro Bastoni dhe Henrikh Mkhitaryan u ndëshkuan me karton të verdhë dhe do mungojnë në ndeshjen e radhës në kampionat kundër Romës. Por Inzaghi shpreson të rikuperojë disa lojtarë të rëndësishëm:

“Shpresojmë të kemi sërish në dispozicion Thuram, Zielinskin dhe Dumfries. Bastoni dhe Mkhitaryan nuk do të jenë kundër Romës, ndaj ndoshta do të luajnë të mërkurën.”

Interi rikthehet në fushë të mërkurën për gjysmëfinalen e kthimit të Kupës së Italisë kundër Milanit, pas barazimit 1-1 në ndeshjen e parë.