Ky është vendi të cilin Trump e goditi me tarifën më të lartë

Presidenti amerikan Donald Trump njoftoi dje se do të vendosë tarifa 10% për të gjitha importet në SHBA, përveç tarifave më të larta për disa nga partnerët më të mëdhenj tregtarë të vendit.

Ai shfaqi një poster ku renditeshin tarifat reciproke, duke përfshirë ato prej 34% për Kinën dhe 20% për Bashkimin Evropian, në përgjigje të tarifave të tyre ndaj mallrave amerikane.

Saint Peter and Miquelon, një enklavë franceze e përbërë nga tetë ishuj të vegjël pranë provincës kanadeze të Newfoundland, ka tarifën më të lartë reciproke në poster.

Bëhet e ditur se Saint Pierre and Miquelon është e vetmja “mbetje” e ish-pronave të mëdha franceze në Amerikën e Veriut.
Dy ishujt më të mëdhenj kanë rreth 6000 banorë, shkruan CNN, përcjell Telegrafi.

Tetë ishujt kanë një sipërfaqe totale prej 242 kilometrash katrorë.

Ndërsa vetëm dy janë të banuar.

Ekonomia mbështetet kryesisht në peshkimin, përpunimin e ushqimeve të detit, turizmin dhe sektorin publik.

Raportohet se vitin e kaluar, ata eksportuan mallra me vlerë 3.4 milionë dollarë në SHBA.

Ndryshe, Trump po vendos një tarifë marramendëse prej 50% për Saint Pierre dhe Miquelon, e cila është shumë më e lartë se tarifa prej 20% e paguar nga Franca si anëtare e Bashkimit Evropian.

I vetmi vend që përballet me tarifa reciproke aq të larta sa Saint Pierre and Miuqelon është Lesoto, një vend me 2.2 milionë banorë i rrethuar nga Republika e Afrikës së Jugut.

Lesoto dërgon 20% të eksporteve të saj, me vlerë 900 milionë dollarë në vit (diamante, veshje, lesh, pajisje elektrike, shtroja) në SHBA.

Të gjitha këto eksporte tani i nënshtrohen një tarife prej 50%.