Ministria e Energjetikës: Pengesat pronësore-juridike i frenojnë projektet energjetike, kërkojmë zgjidhje urgjente

Ministrja e Energjetikës, Minierave dhe Burimeve minerale, Sanja Bozhinovska inicoi takim me të gjitha institucionet relevante për, siç informoi Ministria, “tejkalim të pengesave administrative që e frenojnë zbatimin e projekteve të rëndësishme energjetike”.

Në takim morën pjesë përfaqësues të SHA MEPSO, Agjencisë për kadastër të patundshmërive, Drejtorisë për punë prinësore-juridike dhe Ministrisë së Transportit dhe Lidhjeve.

“Sfida kryesore që e pengon zhvillimin e këtyre projekteve është pritja e gjatë e zgjidhjeve për çështje pronësore-juridike dhe procedurat e ndërlokuara për regjistrim të pronës shtetërore në kadastër. Kjo gjendje drejtpërdrejtë e ngadalëson përparimin e disa investimeve kapitale, mes të cilave edhe projektin Miletkovo, i domosdoshëm për stabilitetin e sistemit elektroenergjetik në atë rajon”, informoi MERMS.

Ministrja Bozhinovska theksoi se “projektet e vëllimit të këtillë nuk guxojnë të qëndrojnë në vend për shkak të proceseve të gjata dhe joefikase administrative”.

“Kjo nuk është vetëm çështje teknike – kjo është çështje e sigurisë energjetike dhe zhvillimit ekonomik. Përgjegjësia e institucioneve është të sigurojnë punë të saktë dhe të koordinuar, që projektet shtetërore infrastrukturore të mos presin pa nevojë”, theksoi ministrja.

MERMS thekson se në takim u dakordua koordinimi i përforcuar ndërinstitucional dhe konstatimi i procedurave të qarta për përshpejtim të proceseve.

“Ministria e Energjetikës, në bashkëpunim me institucionet kompetente, do të punojë në zgjidhje konkrete në mënyrë që të parandalohen stagnime të ardhshme dhe të sigurohet realizim me kohë i të gjitha projekteve strategjike energjetike”, ceket në kumtesë.