Mucunski në Antalya: Ballkani Perëndimor, pjesë thelbësore e së tashmes dhe së ardhmes së Evropës

Ministri i Punëve të Jashtme i Maqedonisë së Veriut, Timço Mucunski ka deklaruar se Ballkani Perëndimor është një pjesë thelbësore e së tashmes dhe së ardhmes së Evropës, transmeton Anadolu.

Ministri Mucunski mori pjesë në panelin e titulluar “Përgjegjësia rajonale për një të ardhme të begattë në Ballkan”, i cili u mbajt në kuadër të Forumit të Diplomacisë në Antalya (ADF2025), ku Anadolu është partner i Komunikimit Global, krahas ministrit të Punëve të Jashtme të Serbisë, Marko Gjuriq, ministrit të Punëve të Jashtme të Bosnjë e Hercegovinës, Elmedin Konakoviq, zv/kryeministrit dhe ministrit të Punëve të Jashtme të Malit të Zi, Ervin Ibrahimoviq, si dhe zv/ministrit të Punëve të Jashtme të Türkiyes, Mehmet Kemal.

Në fjalën e tij, Mucunski theksoi integrimin e Maqedonisë së Veriut në Bashkimin Evropian (BE) si qëllim strategjik dhe avancimin e bashkëpunimit rajonal si prioritet kyç të politikës së jashtme të vendit të tij.

Siç njofton Ministria e Punëve të Jashtme e Maqedonisë së Veriut, Mucunski tha se Ballkani Perëndimor nuk është një problem që duhet menaxhuar, por një rajon i gatshëm për përparim. Ai shtoi se rajoni nuk është një periferi, por “pjesë thelbësore e së tashmes dhe së ardhmes evropiane”.

Ai theksoi nevojën për një rrugë të qartë dhe të prekshme përpara drejt anëtarësimit të plotë në BE si dhe rëndësinë e përgjegjësisë rajonale politike, ekonomike dhe të sigurisë.

Në këtë kontekst, ai iu referua tragjedisë në Koçan të Maqedonisë së Veriut, ku muajin e kaluar si pasojë e zjarrit në një lokal nate humbën jetën 61 persona. Ai këtë tragjedi e cilësoi si shembull të rëndësisë së afërsisë me fqinjët dhe fuqisë së solidaritetit.

Më tej, Mucunski potencoi rëndësinë e investimit në kapitalin njerëzor, forcimin e konkurrencës së sektorit privat dhe promovimin e zinxhirëve të vlerave rajonale si parakusht për rritje të qëndrueshme.

“Vetëm me këtë qasje mund të parandalojmë ikjen e të rinjve, të inkurajojmë qarkullimin e njohurive dhe të ndërtojmë një ekonomi afatgjate të bazuar në inovacion dhe njohuri”, tha Mucunski.

Shefi i diplomacisë maqedonase në fjalën e tij në panel theksoi rolin e SHBA-së si një partner të rëndësishëm që “ofron mbështetje jo vetëm për sigurinë dhe stabilitetin politik, por edhe për zhvillimin ekonomik të rajonit”.